Ish-futbollisti i kombëtares angleze, David Beckham, dhe kampioni i peshave të rënda në boks, Tyson Fury, kanë bërë homazhet e tyre për e Mbretëreshën Elizabeth II, në funeralin e saj. Eventet sportive u ndalën përsëri në Angli ditën e hënë, në shenjë respekti për jetën dhe sundimin historik të monarkes.
Beckham ishte një nga qytetarët që priti gati 13 orë në rradhë për të parë arkivolin e Mbretëreshës në Westminster Hall, teksa legjenda e futbollit anglez ishte i pranishëm dhe në ceremoninë e lamtumirës. Në një postim në rrjetet sociale, Beckham shkruajti:
“Mbretëresha është shtëpia jonë. Sot i dhamë lamtumirën e fundit Madhërisë së saj, Mbretëreshës. Këtë javë bota ka mbajtur zi për humbjen e një lidereje unike, frymëzuese, dhe të dashur. Njerëz nga të gjithë rrugët e jetës u bënë bashkë për të shprehur mirënjohje për Mbretëreshën tonë të dashur…Trashëgimia e shërbimit dhe përkushtimit të saj do të vazhdojë. Jetë të gjatë mbretit.”
Ndërkohë në të njejtën kohë ka reaguar dhe Tyson Fury, i cili në një postim ditën e hënë u shpreh:
“Kam qëndruar jashtë rrjeteve sociale për 10 ditët e fundit, në respekt të Mbretëreshës tonë e cila ndërroi jetë. Shpresoj që funerali të shkojë mirë, ngushëllime familjes së saj dhe le të prehet në paqe përjetësisht.”
Liga Angleze e Futbollit gjithashtu ka reaguar në faqen e saj zyrtare në Twitter, duke kujtuar figurën e Mbretëreshës Elizabeth II. Autoriteti u shpreh:
“Në ditën e funeralit të Madhërisë së Saj, Elizabetës së dytë, EFL dhe klubet e saj duan t’i bashkohen kombit në reflektimin mbi jetën dhe shërbimin e jashtëzakonshëm të monarkes, dhe mendimet tona janë me familjen mbretërore.”
Futbolli në Angli pritet të rikthehet pas 2 javësh, në përfundim të ndeshjeve të kombëtareve.