Ish-trajneri i kombëtares italiane, Antonio Conte, ka identifikuar pika e forta dhe të dobëta të Italisë, të cilat mund të vendosin fatin e finales së madhe të Euro 2020. Conte beson se përfaqësuesja e drejtuar nga Roberto Mancini mund të mbështetet tek eksperienca e lojtarëve, si dhe presioni i lartë për të vënë në vështirësi Anglinë. Trajneri i Interit u shpreh:
“Ne e dimë çfarë do të thotë të luash finale dhe si t’i fitosh ato. Italia e meriton vendin në finale pasi provoi se është një ekip më i kompletuar se të gjithë kundërshtarët me të cilët u vu përballë. Ata janë të aftë të përballen me situate të ndryshme, kur janë dhe kur nuk janë në zotërim të topit. Gjithmonë mundohen të ruajnë idetë, identitetin dhe stilin e tyre të lojës, por në të njejtën kohë adaptojnë kualitetet fizike, teknike dhe taktike të kundërshtarit.”
Conte ka shpenzuar një kohë të madhe të sezonit që lamë pas, duke debatuar me kritikë sportivë për stilin e tij të lojës tek Inter. Shumë prej analistëve kishin rezervat e tyre për strategjinë e ndjekur nga Conte, duke kritikuar faktin se ekipi mbështetej shumë te kundërsulmi dhe jo ngritja e aksioneve nga fillimi. Në mënyrë të natyrshme, tekniku italian nuk ishte i impresionuar me lojën e Spanjës në gjysmëfinale përballë Italisë:
“Dominancë do të thotë të krijosh mundësi për shënim dhe situata të rrezikshme. Në këtë sens, dominimi spanjoll mbi Italinë nuk ishte i qartë. Nëse kontrolli i topit nuk kanalizohet në mënyrë vertikale për t’iu afruar golit ose për të krijuar situata një 1 vs 1 nga krahët, atëhere gjithçka është e kotë.”
Conte beson se Italia është e vështirë për t’u mundur pasi kombëtarja nuk është asnjëherë e papërgatitur, nuk lë hapësira, dhe është në gjendje të gjejë zgjidhje komplekse në fushë.