Sipas raportimeve të The Sun, trajneri i Barcelonës, Xavi Hernandez, ka kërkuar nga drejtuesit e klubit rikthimin e Lionel Messi në Camp Nou. Barazimi ndaj Rayo Vallecano në javën e parë të La Liga ka qënë një arsye më shumë për trajnerin spanjoll, që të mendojë mbi të ardhmen e skuadrës dhe përforcimet e tjera të nevojshme që klubi ka nevojë.
Messi iu bashkua PSG verën e kaluar me kosto zero, por nuk ia doli të kishte të njejtin impakt si tek gjigandët spanjollë. Argjentinasi regjistroi 14 gola dhe 16 asiste në 37 paraqitje. Pavarësisht kontributit përgjithësisht pozitiv, shumë fansa të klubit francez janë shprehur të pakënaqur me paraqitjet e numrit 10, madje disa prej tyre kanë kërkuar largimin e tij me anë të një banderole në ndeshjen ndaj Bordeaux përpara disa javësh.
Barcelona ndërkohë po mundohet të shfrytëzojë situatën, duke u munduar të ngrejë një strategji për rikthimin e superstarit në shtëpinë e vet. Gazetari sportiv Guillem Balague, konfirmoi lajmin duke komentuar problemet që lidhen me mesfushën e Barcelonës. Ai u shpreh:
“Me përjashtimin e Pedri, mesfusha e Barcelonës, qartësisht nuk e ka prekjen e duhur për të luajtur ashtu siç kërkon Xavi, për të gjetur kohën e duhur dhe për të furnizuar sulmuesit. Kjo është arsyeja se përse Xavi kërkon Bernardo Silva si dhe rikthimin e Messi.”
Në fillim të këtij viti, babai dhe njëkohësisht agjenti i argjentinasit, Jorge Messi, u raportua se ishte vazhdimisht në kontakt me drejtuesit e Barcelonës, për të negociuar rikthimin e numrit 10 në Camp Nou. Kontrata e këtij të fundit me PSG skadon në fund të verës së ardhshme, që do të thotë se lëvizja do t’i kushtojë Barcelonës, nëse kërkon të sjellë në këto momente Messin në Katalonjë. Duke thënë këtë, aspekti financiar i lëvizjes mbetet një enigmë.
