Kombëtarja e Danimarkës do të veshë fanella pa logo dhe me ilustrime të zbehta në botërorin e Katarit. Kjo do të jetë një formë proteste e autoritetit të futbollit, për shkeljen e të drejtave të njeriut, dhe trajtimin e emigrantëve në vendin hostues të Kupës së Botës. Hummel, që është marka e cila ka dizenjuar fanellat e përfaqësueses daneze ka komentuar mbi idenë që ka dashur të shprehë:
“Me fanellat dëshirojmë të bëjmë një deklaratë në lidhje me trajtimin e punëtorëve emigrantë që kanë ndërtuar stadiumet e Kupës së Botës, në Katar. Ne besojmë se sporti duhet të bëjë njerëzit bashkë. Kur nuk i bën, duhet të themi diçka.”
Hummel gjithashtu ka dizenjuar një fanellë të tretë, në ngjyrë të zezë, e cila simbolizon jetët e humbura të punëtorëve. Gjithsesi, komiteti suprem i Qatar 2022 ka hedhur poshtë akuzat e Hummel, për vdekjen e punëtorëve të huaj. Autoriteti u shpreh në një deklaratë zyrtare:
“Ne jemi përfshirë në një diskutim robust dhe transparent me Federatën Daneze të Futbollit (DBU). Ne jemi plotësisht kundër hedhjes poshtë të punës dhe vullnetit tone të sinqertë, për të mbrojtur shëndetin dhe sigurinë e 30 mijë punëtorëve, që punojnë për të ngritur stadiumet dhe projekte të tjera. Ne kemi punuar ngushtësisht me qeverinë e Katarit për t’u siguruar që ky kompeticion lë një trashëgimi sociale të mirë dhe afatgjatë.”
Por si janë përgjigjur kombëtaret dhe federatat e tjera, në betejën për më shumë barazi dhe të drejta në sport? Kapiteni i kombëtares angleze, Harry Kane, do të mbajë veshur gjatë ndeshjeve të botërorit një shirit me mbishkrimin “OneLove”. Simbolika erdhi për herë të parë nga kombëtarja hollandeze, dhe qëllimi i saj është promovimi i diversitetit dhe qëndrimi kundër diskriminimit. Belgjika, Franca, Gjermania, Norvegjia, Suedia, Uellsi dhe Zvicra gjithashtu do t’i bashkohen nismës.
