Katari është mposhtur 2-0 nga Ekuadori në takimin hapës të Kupës së Botës. Kjo është hera e parë në historinë e kompeticionit që vendi organizator mposhtet në ndeshjen hapëse. Të besuarit e trajnerit Felix Sanchez nuk ishin të qartë në fushën e blertë dhe shfaqën shenja nervozizmi gjatë takimit, duke mos dalë asnjëherë në lojën e tyre.
Ekuadori dominoi takimin përgjatë 90 minutave, duke shënuar shumë shpejt në minutën e 3’, kur Valencia dërgoi me kokë në rrjetë topin. Megjithatë, goli i lojtaritu u anullua shumë shpejt nga sistemi VAR për pozicion jashtë loje. Pavarësisht kësaj, kjo vetëm sa i motivoi më shumë ekuadorianët, të cilët fituan një penallti në minutën e 16’ të sfidës. Portieri i Katarit, Saad Al Sheeb, ndërhyri në mënyrë të gabuar ndaj Valencia në zone, dhe ish-sulmuesi i West Ham u tregua i saktë nga pika e bardhë, duke kaluar në avantazh të tijët.
Në minutën e 31’ të takimit ishte përsëri Valencia, që me një goditje të bukur me kokë shënoi golin e dytë për Ekuadorin. Pjesa e parë e takimit u mbyll me rezultatin 2-0, teksa Katari nuk pati asnjëherë një shans konkret për të rrezikuar portën e kundërshtarëve.
Shumë prej tifozëve vendas u larguan nga stadiumi në pushimin mes pjesëve, dhe kjo ndikoi në në një atmosferë të vakët gjatë pjesës së dytë. Të zotët e shtëpisë u munduan të futen në lojë duke u treguar më agresivë në kundërsulme, por Ekuadori ia doli të mbrohej me sukses, duke mos i lënë asnjë hapësirë kundërshtarit. Almoez Ali dhe kapiteni Hassan Al Haydos u zëvëndësuan nga trajneri Sanchez 20 minuta përpara përfundimit të takimit, dhe që prej atij momenti të zotët e shtëpisë nuk regjistruan dot asnjë goditje në portën e Ekuadorit. Kualifikimi nga grupi duket tashmë një mision gati i pamundur për Katarin, që do të luajë ndeshjet e rradhës përballë Hollandës dhe Senegalit.