Bayern Munich ka mposhtur përsëri Barcelonën në Champions League, kësaj rradhe me rezultatin e pastër 2-0. Gjermanët janë tashmë të pamposhtur prej 30 takimesh në fazën në grupe të kompeticionit prestigjoz. Ishin në fakt katalanasit ata që kishin rastet më të pastra për gol, sidomos gjatë pjesës së parë, por eksperienca e Bayern ishte ajo që bëri në fund diferencën.
Pjesa e parë u mbyll 0-0, teksa të besuarit e Xavi Hernandez ishin më në kontroll të lojës sesa gjermanët, pavarësisht se nuk arritën të konkretizonin. Por bavarezët reaguan shpejt në pjesën e dytë, duke gjetur golin që në minutën e 50’ të takimit. Ishte Lucas Hernandez i cili shënoi me kokë nga një goditje këndi, pas harkimit të Joshua Kimmich. Goli u pa qartë se goditi psikologjikisht lojtarët e Barcelonës, të cilët vetëm 4 minuta më vonë u ndëshkuan sërish nga një aksion i shpejt i gjermanëve. Kësaj rradhe ishte Leroy Sane i cili u tregua mjaft i qetë në zonë, duke u pozicionuar mirë dhe duke dërguar në rrjetë topin e marrë nga Jamal Musiala.
Barcelona u mundua të krijonte mundësi për një përmbysje të rezultatit por të zotët e shtëpisë u rreshtuan mjaft mirë në gjysmë-fushën e tyre, duke lënë shumë pak hapësira. Lewandowski pati disa raste të mira për shënim, por bomberi polak nuk arriti të gjejë rrugën e rrjetës përballë ish-ekipit të tij.
Bayern ka fituar kështu të dyja takimet hapëse të fazës në grupe të Champions League, dhe kryeson grupin C me 6 pikë. Barcelona dhe Inter kanë nga 3 pikë, duke qënë se kanë arritur fitore respektive ndaj Viktoria Plzen. Duket se gara për kualifikim do të jetë e ashpër në grupin C, teksa përballjet mes Inter dhe Barcelonës me shumë mundësi do të jenë takime direkte për kualifikim.