Londinezët e Chelsea duket se janë në gjendje të bëjnë çdo gjë për të sjellë Matthijs de Ligt në Stamford Bridge. Sipas raportimeve të Sky Sports, drejtuesit e klubit janë të gatshëm t’i ofrojnë Juventus 45 milionë euro plus kartonin e Timo Werner, në këmbim të shërbimeve të mbrojtësit hollandez.
22 vjeçari ka një klauzolë për prishjen e kontratës në vlerën e 120 milionë eurove. Ndërkohë kontrata e tij aktuale me “Zonjën e Vjetër” skadon në vitin 2024. Juventus e di mjaft mirë se është e pamundur të përfitojë këtë lloj shume për kartonin e De Light. Kjo i bën italianët më të prirur të marrin në konsideratë ofertën e Chelsea.
Timo Werner është një lojtar që mund të përshtatet mjaft mirë me modelin e lojës së juventinëve, duke qënë se gjermani mund të ofrojë suport për Dušan Vlahović. Kjo, pavarësisht se të 2 lojtarët aktivizohen në të njejtin pozicion. Ndërsa përsa i përket De Ligt, mbrojtësi është ende i pavendosur mbi të ardhmen e tij. Rinovimi është një çështje që ka ngelur në vend prej kohësh, teksa hollandezi mendohet se nuk është i lumtur me investimet e Juventus. Ai i konsideron ato “të pamjaftueshme” për të garuar në nivelet e larta europiane.
Ndërkohë paralelisht tek Chelsea, Hakim Ziyech mësohet se është në bisedime me Milan për një transferim të mundshëm drejt Serie A. Ziyech erdhi në Londër përpara 2 viteve nga skuadra e Ajax, për shifrën e 33 milionë paundëve. Megjithatë, sulmuesi ka dështuar të tregojë në Angli, të njejtën formë që tregoi me gjigandët hollandezë. Nëse transferimi i Ziyech realizohet, ai do të ishte lojtari i tretë i Chelsea që largohet drejt Milan në vitin e fundit. Olivier Giroud dhe Fikayo Tomori gjithashtu iu bashkuan Milan nga blutë e Londrës, verën e kaluar.
