“Nëse trajneri i Holandës Frank de Boer më merr në telefon, atëherë do t’i thosha po.” – Kjo ka qenë deklarata më e fundit e Arjen Robben, legjendës së “Tulipanëve” dhe Bayern Munich.
Robben, tashmë 37 vjeç, hoqi dorë nga futbolli në vitin 2019, por mesa duket hollandezi nuk i rezistoi dot tundimit për të zbritur përsëri në fushën e blertë. Sulmuesi u rikthye dhe tashmë aktivizohet me FC Groningen në kampionatin hollandez, ekipi ku dhe startoi karrierën e tij si futbollist profesionist. Kujtojmë se Robben gjatë karrierës së tij të gjatë ka veshur dhe fanellat e gjigandëve europianë si PSV, Chelsea, Real Madrid dhe sigurisht Bayern Munich.
Gjithsesi, ajo që ka bërë lajm është intervista e tij e fundit për ESPN, ku shprehu gatishmërinë e tij për t’u aktivizuar në Euro 2020. Sulmuesi veteran deklaroi:
“Padyshim do të ishte kënaqësi, por duhet të jesh realist, në formë të mirë fizike dhe të jesh i bindur se mund të kontribuosh për ekipin. Momentalisht nuk po them që dëshiroj të shkoj (në Euro 2020), por nëse De Boer e kërkon këtë gjë do të them po.”
Gjithsesi, vet trajneri De Boer ka ulur entuziazmin e fansave duke u treguar realist mbi mundësinë e aktivizimit të Robben në Europian. Numri 1 i pankinës hollandeze u shpreh:
“Kurrë mos thuaj kurrë, por në këtë moment nuk e shikoj si mundësi.
De Boer
Jam shumë i lumtur që Arjen po luan përsëri, por duhet t’i vendosim gjërat në perspektivë. Ai nuk ka luajtur asnjë lojë të plotë që prej vitit 2019.”
Në 28 maj, De Boer do të bëjë publike, listën finale të përfaqësueses hollandeze për Euro 2020. Kujtojmë se Virgil van Dijk gjithashtu mbetet në dyshim për një grumbullim të mundshëm. Mbrojtësi i Liverpool është duke iu nënshtruar një procesi intensiv rikuperimi, pas dëmtimit të rëndë që e la jashtë fushave për pjesën më të madhe të sezonit.
