Mbrojtësi i majtë i VfB Stuttgart, Borna Sosa, ka deklaruar për bundesliga.com se mund të jetë pjesë e kombëtares gjermane, në Europianin që do të zhvillohet në verë. Sosa ka qenë një nga yjet e rinj protagonistë të këtij sezoni në Bundesliga, me 9 asiste të regjistruara deri më tani. Kjo shifër e bën 23 vjeçarin, mbrojtësin që ka krijuar më shumë shance për gol në kampionatin gjerman këtë vit.
Sosa, i cili është me origjinë kroate, është aktivizuar plot 56 herë për Kroacinë, deri në nivelin U21. Por, ai mund të bëhet pjesë e “Die Mannschaft” pasi mamaja e tij Vesna ka lindur në Berlin. Klubi i tij VfB Stuttgart, deklaroi për Sky Sport se Sosa ka pranuar shtetësinë dhe pasaportën gjermane. Talenti i ri, me deklaratat e tij, ka lënë të hapur idenë e ndërrimit të kombëtares.
Pas fitores 2-1 të Stuttgart kundër Augsburg, 23 vjeçari u shpreh për mediat mbi këtë çështje:
“Kam pasur kontakte me Oliver Bierhoff (drejtor i përgjithshëm i kombëtares gjermane).
Borna Sosa
Folëm rreth meje por nuk folëm vetëm për Euro 2020 që po afron. Diskutuam gjithashtu për të ardhmen time, për idenë e aktivizimit me Gjermaninë, si do të jetë, dhe detaje të tjera.”
Kur u pyet nëse do të ishte i gatshëm të aktivizohej për kombëtaren gjermane në Euro 2020, përgjigja e Sosa ishte e qartë:
“Po, ekziston një mundësi.” – konfirmoi lojtari.
Megjithatë, pavarësisht mundësisë, lufta për një vend në skuadrën e “Panzerave” për Euro 2020 është e ashpër. Mbrojtësi i Stuttgart mund të jetë në garë me Robin Gosens të Atalantës, apo Marcel Halstenberg që aktivizohet me RB Leipzig. Philipp Max i PSV Eindhoven është një tjetër opsion për krahun e majtë të mbrojtjes së gjermanëve. Mbetet të presim se cila do të jetë lista zyrtare e të përzgjedhurve të trajnerit Löw, për kompeticionin elitar.