Kombëtaret pjesëmarrëse në Europianin e këtij viti, mund të rrezikohen seriozisht nga ideja më e re e klubeve europiane. Një kampionat i veçantë i quajtur “Super Liga”! Super Liga është ideja e 12 klubeve elitare europiane, për një kampionat të ri mes tyre. Liga do të përbëhet nga 6 ekipe angleze: Manchester United, Manchester City, Chelsea, Liverpool, Arsenal dhe Tottenham, si dhe 6 gjigandë të tjerë: Real Madrid, Atletico Madrid, Barcelona, Juventus, AC Milan dhe Inter.
Por, kjo ide rrezikon seriozisht fatin e kombëtareve në Euro 2020, të cilat mund të humbasin yjet e tyre, për shkak të kompeticionit të ri. UEFA i ka dalë kategorikisht kundër idesë së këtij organizimi, duke kërcënuar me ndëshkimet më të rënda për ekipet që do të marrin pjesë. Përfshirë këtu, përjashtimin e lojtarëve të caktuar nga kompeticionet ndërkombëtare.
Duke thënë këtë, në qoftë se kjo ide vihet në zbatim nga klubet, përfaqësueset europiane nuk do t’i ngjajnë më ekipeve që kemi parë deri më sot. Anglisë së Gareth Southgate do t’i mbeteshin vetëm 11 lojtarë të papërjashtuar, me yjet e mëdhenj si Harry Kane apo Sterling jashtë ekipit.
Franca gjithashtu do të humbiste shumë lojtarë. Por “gjelat” kanë në organikën e tyre mjaft talente të reja nga Ligue 1, që mund t’i shpëtojnë në rastin e këtij skenari. Midis tyre janë: Mbape, Mandanda, Maignan, Areola, Pavard, Kimpempe, Dubois, Digne, Hernandez, Kounde, Upamecano, Tolisso, Aouar, Coman, Fekir etj.
Kombëtarja gjermane ndërkohë është me fat, pasi ekipet më të mëdha në Bundesligë. nuk kanë shfaqur interes ndaj konceptit të Super Ligës. Por, nëse Bayern Munich vendos të përfshihet, humbjet për “panzerat” do të jenë të mëdha.
Portugalia gjithashtu do të ishte nga skuadrat më të dëmtuara, pasi do të humbisnin yllin e tyre kryesor, Cristiano Ronaldo. Për të mos përmendur dhe mungesat e mundshme të Bruno Fernandes dhe Bernardo Silva.
Në këto momente na mbetet vetëm të presim për të parë se si do të rrjedhin gjërat me idenë e re të klubeve europiane.
