Ish-legjenda e Liverpool dhe kombëtares angleze, Michael Owen, ka bërë të ditur publikisht lojtarët e tij të preferuar, për vijën e sulmit të “3 Luanëve” në Euro 2020. Me numrin e lartë të lojtarëve të disponueshëm në repartin ofensiv, sulmi është mbase dilema më e madhe e vet trajnerit të kombëtares, Gareth Southgate. Anglezët do të përballen me Kroacinë në 13 qershor. Më pas të besuarit e Southgate do të vihen përballë Skocisë dhe Republikës Çeke.
Sipas Owen, një formacion i mirë sulmues do të përfshinte Jack Grealish si lojtarin klasik me numrin 10. Më pas në të majtë pozicionohet Raheem Sterling, ndërsa në të djathtë Phil Foden. Në krye të sulmit, i preferuari i Owen mbetet Harry Kane, po njësoj si trajneri Southgate.
Michael Owen u shpreh për mediat:
“Mendoj se kombëtarja (Anglia) do të luajë me 4 lojtarë në mbrojtje, 2 mesfushorë p.sh Rice dhe Henderson nëse është në formë, dhe më pas do të ketë 3 lojtarë që do të suportojnë Kane në sulm. Mund të listosh kaq shumë emra, Rashford, Foden, Grealish, Maddison, Sancho gjithashtu është një alternativë. Nëse do të zgjidhja unë do të shkoja me Grealish si numrin 10, Foden në të djathtë, Sterling në të majtë, dhe mbase Rashford në qendër për të shtuar impaktin sulmues të Kane. Mendoj se shpejtësia e Rashford do të jetë shumë e rëndësishme për skuadrën.”
Përsa i përket pozicioneve të tjera, Owen është i besimit se Southgate do të përzgjedhë lojtarët që janë aktivizuar vazhdimisht në ndeshjet e fundit. Sipas tij Gareth do t’i besojë portën Pickford pavarësisht shqetësimeve të fundit. Owen gjithashtu mendon se Reece James është lojtari me propabilitetin më të lartë për të luajtur në pozicionin e mbrojtësit të djathtë. Gjithsesi, për formacionet zyrtare duhet ende të presim, pasi asgjënuk është 100% e sigurt.
