Manchester United siguroi një fitore minimale 1-0, por mjaft të vlefshme ndaj Omonia Nicosia në Europa League. Scott McTominay i cili u fut në lojë si zëvëndësues shënoi të vetmin gol të takimit në minutën e 93’, duke shpëtuar “Djajtë e Kuq”, që deri në atë moment të lojës nuk kishin arritur të zhbllokonin rezultatin. Pavarësisht fitores, anglezët ndodhen përsëri 3 pikë prapa Real Sociedad, që kryeson grupin E.
Të besuarit e Erik ten Hag dominuan takimin duke krijuar disa shanse mjaft të pastra për shënim, por fati nuk ishte në anën e tyre. Për miqtë, lojtari më i mirë ishte padyshim portieri Francis Uzoho, i cili ia doli të priste 11 nga 12 goditjet e United në portën kundërshtare.
Gjithsesi, ky i fundit nuk ia doli të ndalte goditjen e McTominay. Mesfushori skocez zëvëndësoi Casemiron në minutën e 82’, dhe ishte në vendin dhe kohën e duhur për të shfrytëzuar mjaft saktë pasimin e Sanco. McTominay ndali me të parën topin dhe më pas e dërgoi atë në rrjetë.
Omonia gjithsesi pati shanset e vetë për shënim, por qipriotët nuk u treguan të saktë përpara portës së anglezëve. Miqtë u mposhtën 3-2 në përballjen e parë në shtëpinë e tyre, pavarësisht përpjekjeve për të marrë një rezultat pozitiv. Ndërkohë përsa i përket United, shanset për t’u kualifikuar si të parët në grup janë ende aty. “Djajtë e Kuq” do të luajnë ndeshjen e rradhës në date 27 tetor përballë Sheriff Tiraspol.
Pavarësisht performancave që kanë lënë vend për shumë pikëpyetje, të besuarit e Erik ten Hag kanë fituar tashmë 3 ndeshje rresht, që prej humbjes së hidhur 6-3 në derbi ndaj Manchester City. Tekniku hollandez vlerësoi shpirtin luftarak të ekipit të tij pas ndeshjes, duke thënë se kjo është ajo që ai kërkon nga skuadra.