Trajneri i Manchester United, Erik ten Hag, ka thënë se Cristiano Ronaldo nuk është i lumtur me faktin që nuk po luan rregullisht. Portugezi ka startuar si titullar në vetëm 1 ndeshje në Premier League dhe 2 në Europa League këtë sezon. Në disfatën 6-3 përballë Manchester City CR7 nuk luajti asnjë minutë. Ten Hag tha se vendimi erdhi për të respektuar karrierën e jashtëzakonshme të sulmuesit, ndërkohë që së fundmi ka komentuar përsëri situatën:
“Ai (Ronaldo) nuk ishte i lumtur që nuk luajti të dielën. Sigurisht, ai do të luajë dhe është i acaruar kur nuk ndodh. Kjo është e qartë. Por siç u them dhe lojtarëve të mi, kur je në këtë klub dhe ndihesh i lumtur dhe i kënaqur, dhe kur je në stol, nuk duhet të jesh këtu, sidomos kur flasim për Cristiano.”
Ten Hag shtoi:
“Ai është shumë kompetitiv, siç e dimë të gjithë. Kuptohet se nuk është i lumtur kur nuk luan. Por e kam thënë dhe e përsëris, ai po stërvitet shumë mirë, ka një humor të mirë, është i motivuar dhe jep maksimumin. Kjo është ajo që ne presim.”
Ndërkohë tekniku hollandez nënvizoi dhe një herë tjetër faktin se lënia në stol e CR7 ishte një vendim i paramenduar, për të mos-aktivizuar lojtarin në një situatë turpëruese përballë City. Ten Hag deklaroi:
“Mendoj se po të tregohemi të sinqertë, ka një diferencë. Askush nuk është njësoj në skuadër, unë i trajtoj të gjithë me respekt, por lojtarët vijnë nga background-e të ndryshme. Duhet t’i trajtoj ata ndryshe nga njëri-tjetri, për të nxjerrë më të mirën, por sigurisht ka vlera dhe standarte të përgjithshme që vlejnë për të gjithë.”
Në fund të deklaratës për shtyp, Ten Hag tha se disfata ndaj City shërben si një tjetër kujtesë për United, se cili është niveli i lojës që ekipi duhet të arrijë, për të qënë kompetitiv mes më të mirëve.