Trajneri i Liverpool, Jurgen Klopp, ka deklaruar se ekipi i tij duhet t’i rikthehet rregullave bazike të lojës, për të përmirësuar performancën në mbrojtje. “The Reds” kanë pësuar 14 gola në 9 takime në të gjitha kompeticionet këtë sezon, një shifër e lartë dhe e pazakontë për të besuarit e trajnerit gjerman. Liverpool ia ka dalë të mbajë të paprekur portën në vetëm 2 takime. Duke komentuar situatën, Klopp u shpreh:
“Kur vë re një problem dhe mendon se ke gjetur zgjidhjen, mendon se gjithçka do të përmirësohet në moment. Por kjo nuk ndodh asnjëherë në futboll. Kemi pësuar gola të ngjashëm, të cilët kanë ardhur nga të njejtat hapësira. Kur mbrojtja jonë nuk e gjen mirë kohën e vet, jemi shumë të ekspozuar. Pra po, duhet të jemi më kompakt. Mbrojtja është një art dhe ka funksionuar mjaft mirë për ne, për një kohë të gjatë. Por tashmë që nuk po funksionon, kupton se duhet t’i rikthehemi rregullave bazike. Nuk mund të fillojmë çdo gjë nga e para. Nëse ndihmojmë djemtë me mënyra të ndryshme për të mbrojtur, ne duhet ta bëjmë.”
Pas barazimit 3-3 me Brighton, Liverpool gjendet tashmë 11 pikë prapa kryesuesëve të Arsenal në kampionat, të cilët kanë luajtur një ndeshje më shumë. Klopp shtoi:
“Njerëzit pyesin se si ka mundësi që këta lojtarë nuk kanë plotësisht vetëbesim. A mendoni se Cristiano Ronaldo në këtë moment është plotësisht konfident me veten? Ai ishte prej kohësh lojtari më i mirë në botë dhe tani gjërat nuk po shkojnë si ai dëshiron. Kjo ndodh me të gjithë ne… Duhet të bësh gjërat e vogla për të hedhur një hap në drejtimin e duhur, dhe të jesh vërtet gati për momentin e mirë kur ai të vijë, dhe kjo është ajo që po bëjmë.”