Kylian Mbappe ka thënë se e ardhmja e tij tek PSG nuk do të ndikohet nga rezultati i sfidës ndaj Bayern Munich, që do të luhet të mërkurën. Parizienët nuk e kanë fituar asnjëherë Champions League, dhe trofeu prestigjoz ka qënë objektivi numër 1 i ekipit përgjatë sezoneve të fundit. Bayern fitoi 1-0 sfidën e parë në transfertë, dhe duket se francezët do t’i japin përsëri lamtumirën e tyre kompeticionit.
Në këto rrethana, Mbappe ka komentuar:
“Nëse e ardhmja ime do të lidhej me Champions League, pa treguar aspak respekt ndaj klubit, atëherë do të isha larguar me kohë… Nuk mendoj se kjo ndeshje do të ketë një impakt. Jam këtu dhe jam shumë i lumtur. Nuk po mendoj për asgjë tjetër, përveç se t’i sjell PSG sukses.”
Mbappe është përfolur vazhdimisht për një largim të mundshëm nga PSG, me Real Madrid që kryeson listën e favoritëve për të siguruar kartonin e superstarit. Sulmuesi fitoi zyrtarisht statusin e golashënuesit më të mirë të të gjitha kohërave për PSG ditën e diel, kur shënoi golin numër 201 për klubin. Kujtojmë se Mbappe është vetëm 24 vjeç.
Ndërkohë, në lidhje me sfidën ndaj Bayern Munich në Champions, situata nuk duket aspak e favorshme për kampionët e Francës. Neymar nuk do të jetë i disponueshëm, teksa braziliani do të humbasë pjesën e mbetur të sezonit për shkak të një dëmtimi serioz. Në të njejtën kohë, kapiteni Marquinhos, së bashku me mbrojtësin Nordi Mukiele kanë probleme fizike.
Trajneri i Bayern Munich, Julian Nagelsmann, pranoi se me lojën e vet, PSG ofron raste që gjermanët mund t’i shfrytëzojnë. Gjithsesi, tekniku u tregua i kujdesshëm për të vënë në dukje rrezikun që vjen nga kundërsulmet e francezëve. Sfida mbetet e hapur dhe garanton spektakël.
