Në një intervistë ekskluzive për Sky Sports, mbrojtësi francez Raphael Varane ka bërë me dije se me transfermin te Manchester United, ka përmbushur një ambicie të vjetër të tij. Por historia e mbrojtësit me “Djajtë e Kuq” nuk filloi këtë merkato vere.
Ishte viti 2011, kur klubet më të mëdha europiane po përpiqeshin për të afruar Varane në skuadrën e tyre. Në atë kohë, Alex Ferguson trokiti në derën e shtëpisë së Varane në Lille, duke u munduar t’i mbushë mendjen mamasë së futbollistit, që francezi t’i bashkohej United. Siç dihet, kjo nuk ndodhi, dhe pas ndërhyrjes së Zinedine Zidane, futbollisti iu bashkua Real Madrid. Pavarësisht kësaj, takimi me Ferguson duket se ka lënë një gjurmë të paharrueshme në kujtesën e Varane. Mbrojtësi tha:
“Ishte një moment special për mua dhe familjen time. Është fantastike të njohësh një person si ai (Ferguson) kur je 18 vjeç. Pas asaj, mendoj se është fati tënd. 10 vite në Madrid dhe tani jam këtu.”
Varane sigurisht nuk ka asnjë pendesë. Gjatë qëndrimit të tij te madrilenët ai fitoi plot 18 trofe, duke përfshirë këtu 4 Champions League-a. Alex Ferguson gjithashtu nuk ka më arsye për t’u ndier keq, teksa ndoqi debutimin e Varane me United, në ndeshjen përballë Wolves.
Francezi e sheh ardhjen e tij në Angli si një sfidë të re. Ai shtoi:
“Dua të bëhem një lojtar më i mirë. Ky është mentaliteti im. Dua të shtyj veten dhe të përmirësohem. Ky është një kompeticion tjetër (Premier League) dhe atmosfera është ndryshe. Është e gjitha diçka e re për mua, por e kam shijuar deri tani. Të rikthesh Manchester United përsëri në majë është diçka e vështirë. Por, kam vënë re se njerëzit duan të fitojnë dhe të bëjnë gjëra të mira për këtë klub. Kjo më motivon shumë.”