Gara për titull në Premier League sapo ka nisur, por për ish-futbollistin e kombëtares angleze, Alan Shearer, favoritët janë të qartë. Anglezi është i mendimit se Chelsea i Thomas Tuchel është shumë i vështirë për t’u ndalur, dhe ka dhënë argumentat që mbrojnë idenë e tij.
Sipas Shearer, edhe kur gjërat shkojnë keq për Chelsea, siç ndodhi me kartonin e kuq të Reece James, blutë përsëri e gjejnë një mënyrë për të ruajtur balancën në fushë. Fitorja 3-0 përballë Tottenham vërtetoi se të besuarit e Tuchel janë një skuadër vërtet e fortë me një trajner të zgjuar. Shearer analizoi më në detaje sfidën përballë Tottenham:
“Chelsea po dominonte të gjithë fushën në pjesën e dytë. Pas golit të parë, ishte thjesht çështja se sa do të shënonin. Mund të kishin realizuar 6 ose 7 gola në fund të takimit, nëse do të tregoheshin më të saktë përpara portës. Kur Spursat ishin kërcënues në pjesën e parë, të dy qëndër-mbrojtësit e Chelsea ishin mjaft solidë. Sidomos Thiago Silva, i cili për mua ishte lojtari më i mirë i ndeshjes.”
Ish-futbollisti vijoi më tej analizën e tij:
“Ka vetëm 5 javë që sezoni ka nisur dhe Chelsea është përballur me Arsenal, Liverpool dhe Tottenham, duke arritur të marrë 7 pikë nga këto takime. Në ndeshjen që lanë pikë pas, luajtën përballë Liverpool me 10 lojtarë gjatë gjithë pjesës së dytë. Kjo tregon se sa të fortë janë ata mentalisht.”
Një tjetër arsye që Alan Shearer beson fort te Chelsea është dhe Romelu Lukaku. Londinezët humbën shumë shance për shënim gjatë sezonit të kaluar. Për këtë arsye, sulmuesi që erdhi nga Inter është përforcimi kryesor që i duhej Thomas Tuchel. Por të mos harrojmë, se edhe pa të, Chelsea ia doli të shpallej kampion Europe sezonin e kaluar.