Andrew Robertson
Skocia do të garojë për herë të parë në një kompeticion madhor që prej vitit 1998, dhe ylli i tyre kryesor është padyshim mbrojtësi i Liverpool, Andrew Robertson. Skocezi do të mbajë shiritin e kapitenit dhe do të udhëheqë kombëtaren e tij, në përballjen e parë që do të zhvillojnë kundër Republikës Çeke. Me Skocinë, Robertson do të ketë dhe më shumë hapësira për të avancuar përpara dhe treguar aftësitë e tij ofensive.
Jordan Henderson
Roli i Jordan Henderson mund të jetë deçiziv në një kombëtare angleze të mbushur me talente të reja. Kapiteni i Liverpool ka eksperiencën e duhur, sidomos kur bëhet fjalë për ndeshjet me presion të lartë. Aftësia e mesfushorit për të kontrolluar topin në mënyrë të qetë, është pikërisht ajo që synon të arrijë dhe trajneri Southgate. Për këtë arsye, roli i Henderson në kombëtaren angleze pritet të jetë mjaft i rëndësishëm.
Diogo Jota
Diogo Jota ishte ndër të paktët lojtarë të Liverpool që zhvilloi paraqitje pozitive konsistente, gjatë sezonit që lamë pas. 24 vjeçari ka zhvilluar paraqitje mjaft të mira dhe me kombëtaren portugeze, duke arritur të shënojë 3 gola në 3 ndeshje. Në varësi të faktit se sa larg do të shkojë Portugalia në Europian, Jota ka të gjithë potencialin që të jetë një nga yjet e kompeticionit.
Xherdan Shaqiri
Megjithëse Xherdan Shaqiri ka luajtur vetëm disa ndeshje me Liverpool gjatë sezonit që lamë pas, sulmuesi ende ngelet pikë kyçe e kombëtares zviceriane. Shaqiri është tashmë një nga veteranët e ekipit, dhe forca e tij fizike, pasimet e sakta dhe shpirti i garës mund të çojnë larg Zvicrën në Europian.
Thiago
Spanja e Luis Enriques është një nga ekipet me mesfushën më të kompletuar në Euro 2020, dhe njëri prej mesfushorëve është pikërisht Thiago. Megjithëse konkurenca është e fortë, në një skuadër me emra si Marcos Llorente, Rodri, Koke, apo Sergio Busquets, forma e mirë e Thiago gjatë fundit të sezonit me Liverpool, mund t’i japë atij një shans për të treguar veten në Euro 2020.
