Pavarësisht pritshmërive të mëdha dhe suportit të jashtëzakonshëm nga fansat, PSG nuk mundi të shkonte më shumë se barazimi 1-1 me Club Bruges, në ndeshjen e parë të Champions League për këtë sezon.
Debutimi i shumëpritur i Leo Messit në ligën e kampionëve rezultoi një eksperiencë frustruese, teksa treshja e ëndrrave Neymar, Mbappe dhe Leo dështuan të gjenin kiminë e duhur mes tyre. Gjatë lojës Messi goditi dhe tranversën, por dështoi të kishte impaktin që pritej prej tij në fushë gjatë 90 minutave. Ishte në fakt Ander Herrera që u dha avantazhin parizienëve pas lojës mjaft të mirë të Kylian Mbappe nga krahu i majtë.
Pas golit të barazimit nga Club Bruges, Messi po depërtonte më lehtë në mbrojtjen kundërshtare, duke shfrytëzuar dhe lodhjen e belgëve, por asgjë nuk ishte e mjaftueshme për të shkuar në shtëpi me 3 pikë. Ish-ylli i Barcelonës gjithashtu u ndëshkua me karton të verdhë. Por çfarë shkoi keq?
Trajneri Mauricio Pochettino dha shpjegimin e tij:
“Na duhet kohë që ata (lojtarët) të kuptohen me njëri-tjetrin. Kjo është një gjë e qartë që e kemi përmendur disa herë gjatë ditëve të fundit. Ende na duhet të krijojmë një ekip.”
20 minuta nga fundi i takimit, ylli argjentinas tregoi për të parën herë rrezikshmërinë e tij, teksa testoi portierin kundërshtar Simon Mignolet me një goditje me të majtën. Gjithsesi, goli i parë me fanellën e PSG ende duhet të presë. Si për ironi të fatit, Messi mban veshur fanellën me numrin 30 me francezët. Të njejtin numër sulmuesi trashëgoi nga Frank Rijkaard, në debutimin e tij me Barcelonën në vitin 2004. Në atë ndeshje, spanjollët humbën me rezultatin 2-0 përballë Shakhtar Donetsk, por kishin arritur të kualifikoheshin përpara kësaj sfide.
Tifozët e PSG ende nuk e kanë parë superstarin e tyre të performojë në Parc des Princes, por mbase fusha e shtëpisë do të jetë ajo që do t’i sjellë fat 34 vjeçarit, dhe rrjedhimisht dhe klubit.