UEFA dhe FIFA kanë vendosur në dakordësi me njëra-tjetrën që të përjashtojnë klubet dhe kombëtaren ruse, nga çdo kompeticion europian apo botëror, për një periudhë të pacaktuar. Vendimi erdhi si pasojë e sulmit agresiv ushtarak që presidenti Vladimir Putin ka ndërmarrë ndaj Ukrainës.
Kjo do të thotë se kombëtarja ruse e futbollit nuk do të luajë në ndeshjen e playoff-it të Botërorit ndaj Polonisë. Ndërsa përfaqësuesja ruse e femrave nuk do të lejohet të marrë pjesë në Europianin e kësaj vere. Në të njejtën kohë, Spartak Moscow është përjashtuar nga Europa League, ndërsa UEFA gjithashtu ka ndërprerë marrëdhënien e saj me sponsorin gjigand rus Gazprom.
Në një deklaratë të përbashkët, 2 organet kryesore qeverisëse të futbollit në botë bënë me dije:
“Futbolli është i bashkuar dhe në solidaritet të plotë me atë që po ndodh në Ukrainë. Të dy presidentët shpresojnë që situata në Ukrainë të përmirësohet ndjeshëm dhe shpejt, në mënyrë që futbolli të vazhdojë të jetë një vektor uniteti dhe paqeje mes njerëzve.”
Vendimi i UEFA dhe FIFA erdhi pas presioneve mjaft të mëdha të opinionit publik, i cili ka bërë vazhdimisht thirrje për reagim në orët e fundit.
Ndërkohë një tjetër zhvillim interesant është angazhimi i pronarit rus të Chelsea, Roman Abramovich, për të ulur tensionet mes 2 shteteve. Mediat në Angli bëjnë me dije se bilioneri rus është kontaktuar nga drejtues të lartë ukrainas për të ndihmuar në gjetjen e një zgjidhjeje për të rivendosur paqen mes 2 shteteve.
Abramovich është një nga njerëzit më të pasur në Rusi dhe është përfolur vazhdimisht se ka lidhje të afërta me presidentin Vladimir Putin. Zëdhënësi për shtyp i presidentit të Chelsea tha për mediat se rusi është munduar të ndihmojë, që në momentin e nisjes së konfliktit Rusi-Ukrainë.