I gjithë bordi drejtues i Juventus, përfshirë këtu presidentin Andrea Agnelli, kanë dhënë dorëheqjen. Ky është lajmi që kanë publikuar mediat italiane, teksa arsyeja kryesore për vendimin e marrë, është një hetim i autoriteteve italiane mbi transfertat e kryera nga “Zonja e Vjetër”.
Vitin e kaluar, policia italiane deklaroi se kishte nisur një operacion, pas një hetimi mbi të ardhurat nga regjistrimi i lojtarëve, nga viti 2019 në vitin 2021. Agnelli dhe zëvëndës-presidenti Pavel Nedved ishin nën investigim, mes figurave të tjera. Në një deklaratë zyrtare për mediat, drejtuesit e klubit u shprehën se vendimi erdhi pas marrjes në konsideratë të situatës aktuale dhe çështjes gjyqësore që është në proces e sipër. Në deklaratë gjithashtu thuhej:
“Bordi (aktual) e konsideron në interesin më të mirë të Juventus të rekomandojë që klubi të pajiset me drejtues të rinj, për të adresuar këto çështje.”
Drejtori i menaxhimit, Maurizio Arrivabene, do të vazhdojë të mbajë rolin e tij për një periudhë të kufizuar, teksa klubi formon një bord të ri. Ish-presidenti Agnelli ishte një nga arkitektët kryesorë të idesë së Superligës Europiane vitin e kaluar, dhe kjo ishte një tjetër pikë që krijoi acarim mes fansave dhe presidentit të atëhershëm të Juventus.
Klubi është në hetim për paraqitjen e dokumentave të falsifikuara tek investitorët, si dhe falsifikimin e faturave për transaksione që në të vërtetë nuk kanë ekzistuar. Juventus ka mohuar akuzat, që në momentin që ato u bënë publike për herë të parë, por mbetet për t’u parë se cili do të jetë konkluzioni i hetimeve. Ndërkohë, aksionerët e klubit do të mblidhen në date 18 janar për të zgjedhur drejtuesit e bordit të ri.
Përveç Juventus, mendohet se Federata Italiane e Futbollit ka vënë nën hetim dhe disa klube të tjera italiane për të njejtat arsye.
