Dhimbjet e kokës së trajnerit Gareth Southgate duket se do të marrin fund. UEFA ka publikuar rregullin më të ri në lidhje me zhvillimin e ndeshjeve të Euro 2020. Tani skuadrat do të kenë të drejtë të grumbullojnë deri në 26 lojtarë për sfidat e kompeticionit prestigjoz që do të startojë në qershor. Me rregullat e mëparshme, numri maksimal i lojtarëve të grumbulluar ishte 23. Kjo dhuratë nga UEFA duket se zgjidh mjaft dilema të trajnerëve, të cilët kanë më shumë alternativa në duart e tyre.
Rasti konkret është ai i Gareth Southgate. Numri 1 i pankinës së “3 Luanëve” është vendosur përballë disa zgjedhjeve të vështira. Por tani, duket se 3 lojtarët shtesë i kanë dhënë përfundimisht zgjidhje dilemave të mundshme.
Ndër lojtarët e parë të përfaqësueses angleze, që mund të përfitojë nga ndryshimet është Alexander-Arnold. Për shkak të formës me luhatje, mbrojtësi i Liverpool nuk u aktivizua në ndeshjet kualifikuese të Botërorit 2022. Kyle Walker dhe Reece James u përzgjodhën përpara lojtarit të Liverpool, por tani, duket se dhe Trent do të ketë shansin të japë kontributin e tij për Anglinë.
Patrick Bamford është një tjetër talent që tashmë mund të bëhet pjesë e ekipit të Southgate. 27 vjeçari ka treguar aftësitë e tij në çdo mundësi që i është dhënë, pavarësisht se ato kanë qenë të pakëta. Me 14 gola dhe 7 asiste për klubin e tij Leeds, lojtari i ardhur nga akademia e Chelsea përfaqëson një tjetër talent që mund t’i sjellë freski “3 Luanëve”.
Southgate gjithashtu mund t’i hedhë sytë nga Jude Bellingham. Megjithëse nuk ka mbushur ende 18 vjeç, djaloshi i ri ka provuar veten e tij tek gjigandët gjermanë të Borussia Dortmund. Bellingham është përballur në “Champions League” dhe me skuadra mjaft të forta si Manchester City. Për këtë arsye, talenti i ri duket se është gati dhe për ndeshje të një kalibri të lartë si ato të Euro 2020.