Transferimi i mbrojtësit Ben White nga skuadra e Brighton shënoi blerjen e tretë për Arsenal këtë merkato verore. Londinezët kanë qenë mjaft aktivë për të forcuar ekipin e tyre, por 50 milion paundët që paguan për transferimin e White, detyrimisht do t’i detyrojnë “Topçinjtë” që të shesin lojtarë nga skuadra e tyre, për të balancuar financat. Në këtë pikë, i takon trajnerit Mikel Arteta që të marrë vendimet e vështira. Por cilët janë lojtarët që janë më të rrezikuar, për të mos qenë më pjesë e Arsenal?
Njëri prej tyre është Granit Xhaka. Kapiteni zvicerian ka zhvilluar plot 220 paraqitje me Arsenal, që prej afrimit në vitin 2016 nga Borussia Monchengladbach. Karriera e tij te klubi londinez mund të konsiderohet me ulje-ngritje, por duket se për skuadrën e Artetës, një fillim i ri me shumë mundësi nuk do të përfshijë mesfushorin.
Alexandre Lacazette është një tjetër emër mjaft i përfolur për një lëvizje të mundshme këtë merkato. Sulmuesi franzez zotëron potencial të padiskutueshëm, por ardhja në klub e Pierre-Emerick Aubameyang la në hije Lacazette. Gjatë qëndrimit të tij te Arsenal, pavarësisht talentit dhe paraqitjeve pozitive, lojtari asnjëherë nuk është konsideruar si “i pazëvëndësueshëm” në skuadrën e Arteta.
Braziliani Willian po ashtu është në listën e mundshme të lojtarëve që mund të lënë klubin. Sulmuesi erdhi me mjaft entuziazëm nga Chelsea, por asnjëherë nuk arriti të shfaqte tek Arsenal, atë që tregoi në Stamford Bridge. Sipas raportimeve, Arsenal është ende duke i paguar detyrime të mëdha financiare ish klubit të tij, Shakhtar Donestk. Kjo mund të jetë një tjetër arsye për londinezët që të shkëputin marrëdhënien me Willian.
Hector Bellerin, Sead Kolasinac dhe Lucas Torreira janë gjithashtu në rrezik. Mbetet të shohim se kë do të vendosë të “sakrifikojë” Arteta, në mënyrë që Arsenal të ruajë balancat e ekipit, në prag të sezonit të ri futbollistik.
