Pas triumfit mjaft dramatik të Italisë në Euro 2020, përballë Anglisë, disa prej të besuarëve të Southgate u panë të hiqnin medaljet e argjendta, teksa parakalonin në podium. Lojtarët e “3 Luanëve” dukeshin të dëshpëruar pas humbjes, por gjithsesi, ky gjest ka marrë mjaft kritika dhe nuk është lënë i harruar nga opinioni sportiv.
Luke Shaw, Jack Grealish, Phil Foden, Mason Mount dhe Kalvin Phillips ishin vetëm disa prej anglezëve që hoqën medaljet gjatë prezantimit të trofeut. Kapiteni Harry Kane ishte i pari që mori medaljen e argjendë nga presidenti i UEFA-s, Aleksander Ceferin. Megjithatë, vetëm disa momente më vonë, Kane duket se hoqi medaljen që iu akordua, pak përpara se të dilte jashtë planit televiziv. Sulmuesi u pyet nga reporteret nëse medalja e vendit të ishte një arritje, apo një mundësi e humbur. Ai u përgjigj:
“Tani, sigurisht që e shoh si një mundësi të humbur. Nuk të ndodh çdo ditë të arrish finalen, sidomos me ekipin kombëtar. Kanë kaluar 55 vite që prej finales së fundit. Mundësia ishte atje për ne dhe nuk e shfrytëzuam. Kjo do të na trishtojë për një kohë shumë shumë të gjatë. Ky është futbolli, duhet të shkosh përpara.”
Fansat në rrjetet sociale u ndanë në 2 grupe në lidhje me gjestin e lojtarëve anglezë. Disa mbronin idenë se heqja e medaljeve ishte e justifikueshme, duke i trajtuar ato si një simbol të disfatës. Një përdorues në Twitter shkruan:
“Ata sapo humbën ndeshjen më të rëndësishme të karrierës së tyre dhe nuk duan të mbajnë veshur diçka që përfaqëson atë.”
Shumë të tjerë e cilësuan gjestin si “anti-sportiv” dhe “të shëmtuar”. Disa të tjerë e konsideruan fëmijënor. Sipas shumicës së komentuesëve, Anglia ia doli të kualifikohej në finale, dhe humbja me 11-metërsha nuk është aspak arsye për të ndierë turp.