Trajneri tashmë i mirënjohur i kombëtares gjermane Joachim Low, ka bërë të ditur një lajm mjaft interesant në lidhje me planet e tij për Euro 2020. Sipas Low, ekziston mundësia e rikthimit në kombëtare të Thomas Muller dhe Mats Hummels. Ata nuk janë aktivizuar me Gjermaninë që prej vitit 2018.
Die Mannschaft u eleminuan në mënyrë turpëruese nga Kupa e Botës 2018 në Rusi. Kujtojmë se gjermanët nuk e kaluan dot grupin, duke u renditur në vend të fundit pas Suedisë, Meksikës dhe Koresë së Jugut. 1 vit më vonë Joachim Low u shpreh se treshja e njohur e Bayern Munich, Muller, Hummels dhe Jerome Boateng nuk bënin më pjesë në planet e tij për të ardhmen.
Por tani, gati 2 vite më vonë duket se trajneri veteran ka ndërruar mendim. Një arsye mund të jetë forma e dobët e kombëtares gjermane ( kujtojmë këtu humbjen e thellë në shifrat 6-0 përballë Spanjës ). Burime thonë se Low është i mendimit se ajo çka i duhet Gjermanisë për t’u paraqitur denjësisht në Euro 2020, është eksperienca e lojtarëve me përvojë.
I pyetur për “Kicker” Joachim Low u shpreh:
“Rrethana të jashtëzakonshme kërkojnë ndryshime. Fati i tyre ( Muller, Hummels dhe Jerome Boateng ) është një pyetje e vështirë dhe për mua. Mendoj se karakteri i Thomas Muller dhe Mats Hummels është i tillë që nuk pengon lojtarët e tjerë.”
Low gjithashtu tha se integrimi i lojtarëve mund të ndodhë shpejt, por gjermani nuk e përmendi emrin e Boateng. Duket se mbrojtësi i Bayern nuk do të jetë pjesë e arsenalit të “panzerave” për trofeun e lavdishëm europian. Ndërkohë presioni për një performancë të denjë nga Joachim Low është gjithnjë e më në rritje. Kjo konfirmohet dhe nga zërat e shtuar që flasin për një zëvëndësim të mundshëm të tij nga Jurgen Klopp, trajneri i Liverpool.
Burimi: Daily Mail