Jose Mourinho ka kritikuar vendimin e Gareth Southgate, për t’i lënë në dorë Bukayo Saka, penalltinë e 5-të të Anglisë, në finalen e Euro 2020. Gjuajtja e 19 vjeçarit të Arsenal u prit nga portieri italian Gianluigi Donnarumma, duke i dhuruar kështu Italisë fitoren dhe trofeun e lavdishëm të Europianit.
Mourinho, i cili tashmë është zyrtarisht trajner i Romës, beson se penalltitë duhej të merreshin përsipër nga lojtarë me më shumë eksperiencë. Portugezi foli për talkSPORT duke dhënë komentin e tij pas finales:
“Përsa i përket vendimit për lojtarët që do të gjuanin penalltitë, mendoj se është e vështirë të lësh Saka të gjuajë penalltinë e fundit. Jam i mendimit se është e vështirë për një fëmijë që të ketë një peshë aq të madhe në shpatullat e tij, në atë moment. Ndihem keq për të. Ku ishte (Raheeem) Sterling, ku ishte (John) Stones, ku ishte (Luke) Shaw?”
Jose Mourinho shtoi:
“Kam përshtypjen se Gareth është një person shumë i sinqertë. Ai asnjëherë nuk do të thoshte se lojtarët e tij nuk ishin gati për të gjuajtur një penallti.”
Gjithsesi, ish-mbrojtësi i kombëtares angleze, Stuart Pearce, nuk ishte dakord me trajnerin portugez, dhe mbështeti zgjedhjen e bërë nga Southgate. Pearce u shpreh:
“Kur fituam me penallti, në 2 përballjet e mëparshme përpara se të vinim këtu, askush nuk po ankohej për procesin e zgjedhjes së lojtarëve. Jadon Sancho, Marcus Rashford dhe Bukayo duken si karaktere mjaft të fortë. Ata do të rikthehen përsëri.”
Gjithsesi, sipas Mourinho ka plot arsye që Anglia të jetë më optimiste për të ardhmen. Portugezi beson se “3 Luanët” do të jenë padyshim pretendentë mjaft të fortë për të fituar Botërorin e Katarit, i cili është vetëm 1 vit larg. Sipas tij, eksperienca e hidhur në finalen e Europianit do të jetë një mësim i mirë dhe një avantazh në të ardhmen për talnetet e reja në ekipin e Southgate.”