Koreja e Jugut ka arritur një fitore sensacionale përballë Portugalisë, duke siguruar kështu dhe kualifikimin në raundin e ardhshëm të botërorit. Koreanët triumfuan 2-1 përballë Portugalisë, duke eleminuar kështu Uruguain nga grupi, për shkak të golavarazhit më të mirë.
Ishte Hwang Hee-chan ai që i dhuroi fitoren ekipit të tij, shumë pranë mbylljes së takimit në minutat shtesë. Lojtari shfrytëzoi mjaft mirë pasimin e yllit të Tottenham, Son Heung-min, duke dërguar topin në rrjetë dhe duke i hapur kështu rrugë festës së çmendur në kampin korean.
Ndërkohë, golin e parë të takimit e shënuan portugezët që në minutën e 5’ të sfidës, me anë të Ricardo Horta. Horta u bë lojtari i tretë portugez pas Felix dhe Leao, që shënon gol në debutimin e tij në Kupën e Botës këtë edicion. Barazimi erdhi në minutën e 27’ të takimit, pas një rrëmuje në zonën portugeze gjatë një goditje këndi. Mbrojtja portugeze dështoi të largonte rrezikun, teksa topi u përplas në kurrizin e Cristiano Ronaldo. Aty u gjend Kim Young-gwon i cili e pati mjaft të lehtë të dërgonte topin në rrjetë nga distanca e afërt.
Momenti magjik i golit të dytë për koreanët do të vinte në minutën e 91’. Rezultati do të thotë se Portugalia kualifikohet kështu si e para në grupin H, pavarësisht humbjes në këtë sfidë të fundit.
Paralelisht, Uruguai ia doli të mposhtë Ganën me rezultatin 2-0, por përpjekjet e Suarez me shokë në fund shkuan dëm. 2 golëshi i de Arrascaeta ishte i pamjaftueshëm për të përmbysur golavarazhin e Koresë së Jugut. Zhgënjimi ishte i dukshëm në sytë e uruguaianëve në fund të takimit, teksa Suarez u pa me lot në sy. Sulmuesi veterean zhvilloi një paraqitje mjaft të mirë, duke shërbyer de Arrascaeta me asistin deçiziv në golin e dytë.
