Sipas raportimeve të fundit të DailyStar, plani i Kylian Mbappe për t’iu bashkuar Real Madrid në fund të sezonit ka ndryshuar në mënyrë radikale. Superstari i Paris Saint-Germain është tashmë i hapur për t’u transferuar tek Liverpool-i i Jurgen Klopp. 23 vjeçari është linkuar prej kohësh për një lëvizje drejt “Los Blancos”, por pas përballjes mes PSG dhe Real në Champions League, gjërat duken se kanë ndryshuar.
Lajmet në Angli raportojnë se Mbappe është ndier i zhgënjyer nga paraqitja e dobët e Real Madrid në aktin e parë të përballjes së skuadrave në Champions League. Kjo gjë kuptohet se ka lënë të frustruar presidentin Perez, i cili dëshiron që të sjellë lojtarin në Santiago Bernabeu.
Mbappe ishte shpëtimtari i skuadrës së tij, në sfidën ndaj Real Madrid, teksa shënoi golin e fitores në minutat shtesë. Por paraqitja e dobët e spanjollëve ishte lajmi kryesor, dhe kjo ka bërë që sulmuesi të mendojë transferimin e mundshëm në Angli. Këtu gara kryesohet nga Liverpool, ku trajneri Klopp ka dëshmuar disa herë se është mjaft i zoti për të administruar si duhet talentet brenda një ekipi.
Pas ndeshjes me Real Madrid, Mbappe u pyet dhe një herë tjetër mbi të ardhmen e tij. Lojtari ripërsëriti dhe një herë se ende nuk është e sigurt asgjë. Ai tha:
“Nuk e kam vendosur të ardhmen time. Unë luaj për Paris Saint-Germain, një nga klubet më të mira në botë. A do të influencojë kjo ndeshje të ardhmen? Jo, ende nuk e kam vendosur. Do të vazhdoj të jap më të mirën time dhe më pas do të shohim se çdo të ndodhë në fund të sezonit.”
Mbappe gjithashtu komentoi mbi takimin e kthimit, i cili do të luhet në Madrid. Ai tha se PSG nuk mund të shkojë në Santiago Bernabeu duke u mbështetur tek rezultati pozitiv i ndeshjes së parë. Sipas tij, kjo gjë nuk i shkon për shtat një klubi si PSG.
