Pas përpjekjeve të mëparshme të Chelsea, Arsenal gjithashtu është futur në garë për shërbimet e Moises Caicedo. Mesfushori i Brighton ka qënë një nga lojtarët më të përfolur këtë merkato janari, por duket se klubi i tij aktual ia ka dalë t’i rezistojë presionit për të hequr dorë prej tij.
Arsenal ka bërë një ofertë zyrtare prej 60 milionë paundësh për ekuadorianin, por Brighton ka refuzuar këtë shifër. Mikel Arteta kërkon të përforcojë ekipin e tij, dhe sidomos repartin e mesfushës. Mohamed Elneny është i dëmtuar, dhe “topçinjtë” nuk kanë shumë opsione kur vjen fjala tek stoli. Trajneri Arteta kërkon që ekipi të mos humbasë terren në kampionat për shkak të mungesës së alternativave, por duket se Arsenal duhet të kërkojë për një tjetër mesfushor.
Brighton nuk është ende gati të heqë dorë nga Caicedo, teksa klubi refuzoi një ofertë të mëparshme të Chelsea për lojtarin, në shifrat e 55 milionë paundëve. “Pulëbardhat” hoqën dorë nga Leandro Trossard këtë muaj, me këtë të fundit që iu bashkua pikërisht Arsenal, dhe ekipi nuk dëshiron të humbasë një tjetër lojtar të rëndësishëm, pasi kjo mund të dëmtojë seriozisht progresin e ekipit në kampionat.
Kujtojmë se Brighton gjithashtu humbi 3 lojtarë të rëndësishëm në merkaton e verës. Marc Cucurella iu bashkua Chelsea, Yves Bissouma u largua drejt Tottenham, ndërsa Neal Maupay zgjodhi Everton.
Në një konferencë të fundit për mediat, trajneri i Brighton, Roberto de Zerbi, qetësoi fansat duke thënë se për momentin Caicedo është i përqëndruar vetëm tek Brighton. Gjithsesi, tekniku nuk përjashtoi edhe mundësinë e largimit. Ai tha për mediat:
“Fola me të (Caicedo) si një baba, jo si trajner. Shpresoj të rrijë me ne të paktën deri në fund të sezonit, sepse sipas mendimit tim, kjo është më e mira për ne dhe për atë. Ai tha se për momentin është i fokusuar tek Brighton.”
