Chelsea dhe Newcastle janë duke monitoruar ish-sulmuesin e Manchester City, Brahim Diaz. Lojtari i Real Madrid është duke luajtur momentalisht sezonin e tretë me italianët e Milan si i huazuar, dhe mediat angleze bëjnë me dije se lojtari mund të jetë i gatshëm për një aventurë të re në verë.
Diaz kaloi plot 4 sezone te Manchester City, por për fat të keq nuk ia doli dot të debutante asnjëherë me ekipin e parë. Më pas, sulmuesi iu bashkua Real Madrid në vitin 2019, por hapësirat në Santiago Bernabeu ishin gjithashtu të kufiziuara.
Gjithsesi, Diaz ka gjetur vendin e titullarit me AC Milan në Itali, dhe ishte pjesë e ekipit që fitoi kampionatin sezonin e kaluar. Për më shumë, Diaz ishte mjaft i rëndësishëm në fitoren e Milan në Champions League përballë Tottenham, teksa lojtari shënoi golin e vetëm të sfidave, duke udhëhequr kuqezinjtë drejt një kualifikimi historik.
Klubi italian ka opsionin për të blerë përfundimisht kartonin e sulmuesit për shifrën e 19.5 milionë paundëve, por Real gjithashtu ka të drejtë të blejë përsëri lojtarin për shifrën e 24 milionë paundëve, sipas kontratës së tij aktuale. Gjithsesi, spanjollët nuk duken të interesuar për ta hedhur këtë hap, dhe kjo i jep akoma më shumë mundësi veprimi Chelsea dhe Newcastle.
Ndërkohë, blutë e Londrës kanë vendosur t’i ofrojnë N’Golo Kante mundësinë e një kontrate të re, pavarësisht dëmtimeve të përsëritura që lojtari ka pësuar. Mësohet se mesfushori francez do të duhet të firmosë një kontratë prej 2 vitesh, plus opsionin për rinovim dhe për një vit ekstra.
Kontrata e tij aktuale me Chelsea skadon në fund të sezonit, por duket se klubi ende beson tek talenti francez. Kante nuk është aktivizuar me Chelsea që prej gushtit të vitit të kaluar, dhe pritet të jetë gati për t’iu rikthyer fushave të blerta në javët e fundit të sezonit aktual.