Mesfushori i Barcelonës, Franck Kessie, është përfolur së fundmi për një transferim të mundshëm në Premier League. Lojtari duket se e ka humbur vendin e titullarit në ekipin e trajnerit Xavi, dhe kjo i ka hapur rrugë në mënyrë të natyrshme largimit. Londinezët e Chelsea janë ndër ekipet e interesuara për shërbimet e Kessie, teksa blutë kërkojnë me patjetër përforcime në mesfushë.
Pronari i ri i Chelsea, amerikani Todd Boehly, ka shpenzuar gati 200 milionë paundë këtë merkato janari, duke afruar 6 lojtarë të rinj në ekip. Megjithatë, mësohet se drejtuesit e bluve janë ende në kërkim të një mesfushori kualitativ. Argjentinasi i Benfica, Enzo Fernandez, është alternativa e parë e Boehly, por shuma prej mbi 100 milionë paundësh që Benfica kërkon për shërbimet e tij, ka bërë që Chelsea të mendojë dhe për një plan B.
Kartoni i Kessie kushton shumë më pak, por mediat spanjolle bëjnë me dije se lojtari është i prirur të qëndrojë tek Barcelona deri në fund të sezonit, sidomos nëse klubi katalanas nuk merr një ofertë të majme për të. Mendohet se trajneri Xavi kërkon t’i japë një shans Kessie në gjysmën e dytë të sezonit, dhe mesfushori gjithashtu kërkon të provojë veten e tij në Camp Nou.
Sipas spanjolles Onda Cero, Tottenham Hotspur është gjithashtu i interesuar për Franck Kessie, madje londinezët kanë bërë dhe një ofertë për të, që mendohet të jetë në shifrat e 13 milionë paundëve. Gjithsesi, përgjigja e Barcelonës ka qënë negative. Në rast se Chelsea apo dhe vet Tottenham vjen me një ofertë më të mirë, nuk përjashtohet mundësia që spanjollët të ndryshojnë qëndrimin e tyre deri në fund të merkatos. Sidomos duke marrë parasysh nevojën e Chelsea për mesfushorë, duke ditur se Kante dhe Kovacic janë ende të dëmtuar.