Sipas prestigjozes Football Insider, Liverpool, Manchester United dhe Barcelona pritet të përfshihen në një garë financiare në merkaton e verës, për të siguruar kartonin e Ruben Neves. Portugezi i talentuar mësohet se është gati të largohet nga Wolves në fund të sezonit, edhe nëse klubi arrin të shmangë rënien nga kategoria. Neves është në kërkim të një sfide të re, në një ekip të nivelit më të lartë ku mund të fitojë trofe.
Barcelona është prej kohësh admiruese e 26 vjeçarit, por problemet financiare të spanjollëve mendohet se do t’ia vështirësojnë bërjen e një oferte për Neves. Nisur nga kjo, Liverpool dhe Manchester United kryesojnë garën për shërbimet e mesfushorit.
Liverpool ka si mision kryesor rinovimin e mesfushës sezonin e ardhshëm teksa Naby Keita dhe Alex Oxlade-Chamberlain pritet të largohen nga klubi. Në të njejtën kohë, e ardhmja e James Milner është gjithashtu e paqartë. Manchester United gjithashtu ka nevojë për më shumë opsione në mesfushë, pasi Scott McTominay pritet të largohet në verë, ndërkohë që Marcel Sabitzer gjithashtu pritet të rikthehet tek Bayern në fund të periudhës së huazimit.
Kontrata e Neves me Wolves skadon pas 18 muajsh dhe klubi nuk do të ndalojë lojtarin të largohet, duke qënë se negociatat e mëparshme për një rinovim kontrate kanë dështuar. Ish-superstari i Porto mban shiritin e kapitenit tek Wolves dhe ka qënë një nga lojtarët më të rëndësishëm për ekipin.
Megjithatë, klubi po përballet me një situatë mjaft të vështirë në Premier League. Pavarësisht se ndodhet në vendin e 13 në renditjen e përgjithshme, Wolves e ndajnë vetëm 4 pikë nga vendi i fundit që mbahet nga Southampton. Rreziku për rënie nga kategoria është mjaft i lartë dhe kjo është një tjetër arsye se përse Neves kërkon një aventurë të re, larg Molineux Stadium.