Manchester City ka gjetur akordin me Anderlecht për transferimin e mbrojtësit spanjoll, Sergio Gomez. Lojtari është pjesë e kombëtares U21 të Spanjës dhe ka tërhequr shumë vëmendje së fundmi me performancat e tij në nivel klubi por dhe kombëtareje.
City ka qënë vazhdimisht në lëvizje për të përforcuar krahun e majtë të mbrojtjes gjatë kësaj merkatoje. Pep Guardiola kishte vendosur si objektiv kryesor të tij, mbrojtësin e Brighton, Marc Cucurella. Por, ky i fundit vendosi t’i bashkohej Chelsea për shifrën e 62.5 milionë paundëve, gjë që detyroi “qytetarët” të kërkojnë për opsione të tjera.
Dhe mesa duket Guardiola ka vendosur të mos shpenzojë shifra të jashtëzakonshme, duke investuar në një talent të ri dhe mjaft premtues. Megjithatë, konkurrenca tek City është mjaft e fortë, dhe nëse Gomez nuk ia del të sigurojë vendin e tij në ekipin e parë, ai mund të aktivizohet si i huazuar tek Girona në Spanjë. Këta të fundit i përkasin të njejtit grup që zotëron Manchester City.
Sergio Gomez është një produkt i akademisë së Barcelonës, por lojtari nuk luajti asnjë sezon të vetëm me ekipin e parë. Ai iu bashkua Borussia Dortmund, por nuk gjeti hapësirat e duhura tek klubi gjerman, dhe për këtë arsye luajti si i huazuar tek Huesca për 2 vite. Më pas Gomez u transferua tek Anderlecht në Belgjikë.
Afrimi më i rëndësishëm i kësaj merkatoje për City ishte padyshim Erling Haaland, i cili e nisi në mënyrën më të mirë sezonin në Premier League. Norvegjezi ishte autori i 2 golave në fitoren e pastër të City ndaj West Ham në transfertë. Sulmuesi u shpreh se ndeshja ishte një moment mjaft krenar për të dhe familjen e tij, dhe dha premtimin se golat nuk do të ndalen edhe në përballjet në vijim.
