Sipas prestigjozes Dailymail në Angli, trajneri i Romës, Jose Mourinho është duke menduar seriozisht rikthimin në Premier League. Më saktësisht tek Chelsea, ku portugezi ka qënë dhe 2 herë të tjera trajner. Përfaqësuesit e “The Special One” ia kanë bërë të qartë dëshirën e Mourinho drejtuesëve të Chelsea, pavarësisht se këta të fundit kanë ende besim tek Graham Potter.
Gruaja dhe fëmijët e Mourinho ende jetojnë në Londër, ndërkohë që vet trajneri ka preferuar gjithmonë Premier League-ën, mbi të gjitha kampionatet e tjera. Një tjetër arsye se përse portugezi dëshiron të largohet nga Roma është pamundësia e klubit italian për të mbështetur financiarisht objektivat e Mou në merkato.
Mourinho ia doli të triumfonte në Europa Conference League sezonin e kaluar me ekipin e tij, ndërkohë këtë vit Roma ndodhet momentalisht në vendin e pestë në kampionat. Kryeqytetasit e kanë të vështirë të konkurrojnë për titullin kampion, për shkak të mungesës së fondeve për të investuar tek lojtarë cilësorë. Dihet se në Premier League Mourinho nuk do të ketë këtë problem, duke marrë parasysh fuqinë blerëse të klubeve.
Por, Chelsea nuk është i vetmi opsion në radarin e trajnerit, teksa West Ham është gjithashtu një tjetër klub potencialisht i interesuar në shërbimet e Mourinho. Trajneri aktual, David Moyes, po kalon një periudhë të vështirë nën drejtimin e skuadrës, megjithatë, ende nuk dihet nëse drejtuesit e klubit duan që Moyes të vazhdojë punën deri në fund të sezonit, apo po kërkojnë për një trajner të ri që tani.
Mourinho nuk dëshiron të largohet nga Roma në mes të sezonit, dhe sipas të gjitha gjasave nuk do të jetë i disponueshëm deri në korrik. Megjithatë, kjo pritet t’i ofrojë më shumë alternativa portugezit në fund të këtij sezoni. Bazuar në ecurinë e Chelsea, nuk do të ishte surprizë nëse vendi i trajnerit në Stamford Bridge të lirohej në verë.