Drejtuesit e Liverpool janë gjithnjë e më të sigurt se “The Reds” kryesojnë tashmë garën për kartonin e Jude Bellingham. Pas lajmit se Kalvin Phillips do t’i bashkohet shumë shpejt Manchester City, “qytetarët” sipas të gjitha gjasave i kanë përmbushur objektivat e tyre të merkatos përsa i përket mesfushës.
Kjo do të thotë se një kundërshtar mjaft i fortë është tashmë jashtë loje, në garën për shërbimet e talentit të Borussia Dortmund. Pavarësisht se ekipi i Pep Guardiolës përsëri mund të tentojë të hidhet në garë për Bellingham gjatë merkatos së ardhshme, anglezi do ta ketë mjaft të vështirë të gjejë hapësira në mesfushën e City, nëse vendos t’i thotë po një transferimi në Etihad.
Nga ana tjetër, Liverpool është i gatshëm t’i garantojë lojtarit vendin e titullarit. Kjo është mjaft e rëndësishme për Bellingham, jo vetëm për karrierën e tij në nivel klubi, por dhe për atë në nivel kombëtareje. Konkurrenca në përfaqësuesen angleze është tejet e lartë në çdo repart, dhe vetëm parqitjet e rregullta në nivel klubi mund t’i sigurojnë Bellingham vendin e titullarit në ekipin e “3 Luanëve”.
Jurgen Klopp është një adhurues i madh i yllit të Borussia Dortmund, dhe e ka piketuar që tani Bellingham si objektivin kryesor në merkaton e ardhshme. Këtë verë gjermani kishte prioritet sulmin dhe Liverpool zyrtarizoi me sukses marrëveshjen me Darwin Nunez për plot 85 milionë paundë, duke zëvëndësuar me sukses Sadio Mane i cili u largua drejt Bayern Munich.
Ndërkohë në lidhje me Bellingham, Manchester United është gjithashtu një nga ekipet e interesuara. Erik ten Hag është një adhurues i anglezit dhe ekipi ka nevojë për përforcime në mesfushë, sidomos pas largimit të Paul Pogba. Por, “Djajtë e Kuq” duhet të kualifikohen patjetër në Champions League sezonin e ardhshëm, nëse duan të kenë një shans për të siguruar kartonin e Bellingham.
