Manchester United ka hyrë tashmë në lojë si ekipi i rradhës që interesohet për mbrojtësin e Lille, Sven Botman. Ky i fundit është në një fazë të avancuar të bisedimeve me Milan, teksa gjigandët italianë kanë gati rreth 25 milionë euro për të siguruar kartonin e tij. Por “Djajtë e Kuq” mund të prishin negociatat duke joshur Botman me një transferim në Premier League.
Javën e kaluar, trajneri i ardhshëm i United, Erik ten Hag, ka patur një takim me drejtorin e futbollit të Manchester United, John Murtough. Në këtë mbledhje është diskutuar mbi objektivat e mundshëm në merkaton e verës, dhe një nga emrat më të lakuar ka qënë dhe shtatëlarti hollandez.
Botman ishte pjesë e Ajax deri në vitin 2020, përpara se të transferohej në kampionatin francez ku shkëlqeu me Lille. Impakti i lojtarit ishte i dukshëm teksa klubi francez u shpall kampion gjatë sezonit të kaluar, por Botman regjistroi paraqitje mjaft të mira dhe në Champions League. Kjo gjë duket se ka bindur drejtuesit e United të ndjekin më nga afër progresin e mbrojtësit.
Lojtari ishte në qëndër të vëmendjes së mediave, dhe gjatë merkatos së janarit, ku u përfol për një transferim të mundshëm tek Newcastle. Pas atij momenti Botman bëri të qartë qëndrimin e tij, duke lënë të hapur mundësinë e një aventure tjetër diku në verë:
“Të gjithë thonë se Newcastle do t’ia dijë vetëm për paratë, por mendoj se është një projekt mjaft i mirë. Sidomos duke marrë parasysh Manchester City dhe PSG, që filluan po njësoj rrugëtimin. Mendoj se do të ishte diçka e bukur të isha pjesë e atij projekti, por Milan është një klub i bukur. Për momentin ndihem mirë te Lille. Mendoj se në verë do të ndërmarr një tjetër hap në karrierën time. Por nuk i dihet asnjëherë në futboll…”