Drejtuesit e Manchester United mund të lënë Cristiano Ronaldon të largohet këtë merkato vere, duke u nisur nga situata mjaft problematike me të cilën po përballet klubi. Pavarësisht fjalës së trajnerit Erik ten Hag, se portugezi nuk është në shitje, figura të tjera të rëndësishme në hierarkinë e “Djajëve të Kuq” mendojnë ndryshe.
Burime të caktuara pranë klubit deklarojnë se CR7 ka një prezencë negative në dhomat e zhveshjes, nuk komunikon shumë me shokët e skuadrës, si dhe mbi të gjitha, e ka shprehur hapur dëshirën e tij për t’u larguar. Sulmuesi ka dhe një vit të mbetur në kontratën e tij aktuale, por humbjet shokuese ndaj Brighton dhe Brentford duket se kanë rikthyer përsëri debatin mbi rolin e bomberit në Old Trafford.
Zëra të tjerë pranë klubit kanë deklaruar për BBC, se ekziston ndjesia se largimi i Ronaldo do të sillte uljen e tensioneve në dhomat e zhveshjes, dhe eventualisht paraqitje më të mira. Ish-mbrojtësi i Manchester United, Gary Neville komentoi situatën e CR7 për Sky Sports. Ai u shpreh:
“Për Ronaldon duhet të merret një vendim i rëndësishëm. Ai është qartësisht jo i lumtur. Problemi është nëse humbasin atë, nuk ka më asgjë në repartin golashënues të fushës. Mendoj se nëse ai largohet dhe nuk sjellin lojtarë të tjerë, United mund të përfundojë sezonin në gjysmën e poshtme të renditjes.”
Sezonin e kaluar, Ronaldo ishte golashënuesi më i mirë për United, dhe i treti në Premier League. Megjithatë, klubi nuk ia doli dot të kualifikohej në Champions League, duke e mbyllur kampionatin në vendin e 6.
Nëse Ronaldo largohet, bordi drejtues i “Djajëve të Kuq” do të përballet me një mision të vështirë, teksa afrimi i lojtarëve të rinj ka dështuar gjatë javëve të fundit të merkatos. Arsyeja kryesore ka qënë fakti se United nuk do të luajë në Champions League këtë sezon.
