Manchester United është shumë pranë akordit me mesfushorin e talentuar të Lazio, Sergej Milinkovic-Savic. Sipas The Sun, palët kanë rënë dakord për detajet e marrëveshjes, por gjithçka mund të prishet nga dëshira e lojtarit për t’iu bashkuar Real Madrid.
Fansat e Lazio u paralajmëruan në mënyrë indirekte nga drejtuesit e klubit, për të shijuar talentin e Milinkovic-Savic, për sa kohë ai ende luan në Stadio Olimpico, duke dhënë kështu indicie për një largim të mundshëm. Futbollisti ka qënë prej kohësh në vëmendjen e disa prej klubeve “big” të Europës, por United në veçanti, ka ndjekur prej vitesh serbin. Ky i fundit iu bashkua Lazio nga belgët e Genk në vitin 2015. Që prej atij momenti, Milinkovic-Savic ka shënuar 54 gola në 270 paraqitje me italianët.
Sezoni aktual po kthehet në një nga më të mirët në karrierën e tij, teksa lojtari ka regjistruar 7 gola dhe 8 asiste në 21 ndeshje të Serie A. Kjo ka bërë që trajneri Maurizio Sarri ta përshkruajë serbin si një nga lojtarët më të mirë me të cilët ka punuar. Tekniku italian tha:
“Kam trajnuar shumë lojtarë të mëdhenj, por ai është një nga më të mirët. Progresi i tij në 2 muajt e fundit ka qënë ekselent dhe besoj se mund të hedhë një tjetër hap në karrierën e tij. Më përpara ai e humbiste topin shumë shpesh, por tani luan me më shumë vendosmëri.”
Presidenti i Lazio, Claudio Lotito, po shpreson që serbi të vazhdojë me paraqitjet e tij pozitive deri në fund të sezonit. Në këtë mënyrë, drejtuesit italianë mund të përfitojnë deri në 67 milionë paundë për kartonin e tij në merkaton e verës, mbase dhe më shumë. Juventus dhe Inter gjithashtu po monitorojnë situatën e Milinkovic-Savic, por dëshira e futbollistit është të largohet nga Italia.