Arsenal dhe Newcastle pritet të përfshihen në një betejë financiare gjatë merkatos së verës. Klubet angleze kërkojnë të bëjnë të vetin talentin e Bayer Leverkusen, Moussa Diaby. Ky i fundit është linkuar vazhdimisht me një lëvizje drejt Emirates, por duket se së fundmi, garës për kartonin e tij i është bashkuar dhe Newcastle.
Që prej ardhjes së pronarëve të rinj në klub, Newcastle ka rritur ndjeshëm potencialin financiar dhe investimet në merkato, ku Alexander Isak, Bruno Guimaraes dhe Sven Botman janë disa nga emrat më të spikatur mes afrimeve të reja. Klubi pritet të jetë aktiv edhe në merkaton e ardhshme, dhe duket se anësori Diaby është një nga objektivat kryesore.
Sipas prestigjozes 90min, Bayer Leverkusen e vlerëson kartonin e francezit në shifrat e 62 milionë paundëve, një shifër mëse e përballueshme për Newcastle, por dhe për Arsenal. Mediat angleze bëjnë me dije se Newcastle gjithashtu ka targetuar dhe mbrojtësin e Bayer Leverkusen, Mitchell Bakker.
Ndërkohë në lidhje me Diaby, francezi ka qënë një nga lojtarët më të rëndësishëm për Bayer Leverkusen gjatë viteve të fundit. Këtë sezon sulmuesi ka arritur të shënojë 12 gola në 34 paraqitje në të gjitha kompeticionet. Drejtori sportiv i klubit gjerman, Simon Rolfes, është shprehur se Bayer Leverkusen dëshiron që Moussa Diaby të jetë pjesë e skuadrës, për sa më shumë të jetë e mundur. Rolfes tha:
“Kur shikoj Moussa Diaby dhe krahasoj sesi ishte ai para portës kur erdhi para 3 viteve te Leverkusen, dhe si është tani, nuk është rastësi që ai shënon më shumë gola. Mund ta shohësh në trajnim. Ai punon fort për gjuajtjet. Ai ka humbur shumë raste për shënim më parë, edhe në trajnim, por tani është histori tjetër…Sigurisht, duam ta mbajmë Moussa për sa kohë të jetë e mundur. E di se shumë agjentë janë ulur në tribunën tonë gjatë ndeshjeve, pasi kemi shumë lojtarë të rinj interesantë, me potencial të lartë.”
