Spanjollët e Real Madrid janë duke monitoruar situatën e Harry Kane tek Tottenham, teksa madrilenët janë në kërkim të një sulmuesi të ri. Klubi anglez ka lënë të kuptohet se kapiteni i kombëtares angleze mund të firmosë një kontratë të re me klubin londinez, por burime pranë lojtarit thonë se ai është në kërkim të trofeve, dhe e di mjaft mirë se ky është një objektiv mjaft i vështirë për një klub si Tottenham.
Këtu hyn në lojë Real Madrid, që është vetëm 1 nga shumë klube që do të mundohen të joshin Kane në merkaton e verës. Gjithsesi ky operacion pritet të jetë mjaft i komplikuar. Tottenham mendohet se kërkon mbi 100 milionë paundë për Kane, dhe duke marrë parasysh moshën e sulmuesit (29 vjeç), do të jetë e vështirë që kërkesat e klubit londinez të plotësohen.
Përveç Real Madrid, për Kane interesohen dhe Manchester United dhe Bayern Munich. Megjithatë, spanjollët kanë një avantazh mjaft specifik ndaj rivalëve anglezë, në garën për kartonin e Kane. Presidenti i Tottenham, Daniel Levy, nuk preferon që Kane të transferohet te një nga klubet rivale në Premier League, duke fuqizuar kështu kundërshtarët në kampionat.
Për këtë arsye, Real Madrid mund të jetë në gjendje të sigurojë shërbimet e bomberit, për një çmim më të arsyeshëm, ndërkohë që Kane gjithashtu realizon ëndrrën e tij, e cila është të luajë për një ekip ku mund të fitojë më lehtë trofe.
Galaktikët ndërkohë i kanë ofruar Benzema një rinovim kontrate, ndërkohë që interesi për Kylian Mbappe gjithashtu mbetet i lartë. Gjithsesi, Harry Kane është tashmë një tjetër alternativë solide. Shumë gjëra do të varen dhe nga fati i trajnerit Carlo Ancelotti, i cili sipas të gjitha gjasave do të largohet nga Santiago Bernabeu në fund të sezonit. Ish-trajneri i Tottenham, Mauricio Pochettino, përflitet si një nga zëvëndësuesit e mundshëm të italianit. Nëse argjentinasi vendoset në krye të pankinës së Real, transferimi i Kane në Madrid gjithashtu duket më i lehtë, duke qënë se sulmuesi ka punuar më parë me Pochettino tek Tottenham.