Trajneri i Manchester City, Pep Guardiola, i ka thurrur lavde trajnerit të Brighton, Roberto de Zerbi. De Zerbi ka shkëlqyer në detyrën e tij që prej largimit të Graham Potter dhe shumë fansa janë të mendimit se çmimi i trajnerit të sezonit në Premier League i takon italianit, pavarësisht se ishte Guardiola ai që triumfoi dhe u shpall kampion me ekipin e tij. Vet tekniku spanjoll ka thënë:
“Roberto është një nga trajnerët më me influencë në 20 vitet e fundit. Nuk ka asnjë ekip që luan ashtu siç luajnë ata, janë unikë. E kisha këtë ndjesi kur ai erdhi në krye të ekipit se impakti i tij në Premier League do të ishte i madh, por nuk e prisja të ishte kaq i shpejtë. Ai krijon 20-25 raste për shënim për ndeshje, shumë më mirë sesa shumica e kundërshtarëve. Ai e monopolizon topin në një mënyrë që nuk është parë prej kohësh… Ata e meritojnë plotësisht suksesin që kanë.”
Kujtojmë se nën drejtimin e De Zerbi, Brighton ia ka dalë të kualifikohet në një kompeticion europian, për herë të parë në historinë e vet. Trajneri iu bashkua ekipit anglez nga skuadra e Shakhtar Donetsk. De Zerbi gjithashtu ka udhëhequr dhe shumë klube italiane si Palermo, Sassuolo dhe Benevento.
Brighton gjithashtu luan një lojë të rrezikshme duke tërhequr kundërshtarët në zonën e vet, para se të lëshojë një pasim përpara, një tjetër detaj që Guardiola e adhuron tek De Zerbi. Spanjolli shtoi:
“Brighton janë specialistë për të pasuar në momentin e duhur tek lojtarët e lirë. Ata lëvizin në momentin e duhur. Nuk e pasojnë topin, derisa kundërshtari lëviz. Nëse nuk luan në një nivel të lartë, ata mund të bëjnë ç’të duan kundër teje. Janë një nga ekipet që mundohem të mësoj prej tyre.”