Manchester United u poshtërua 6-3 në Etihad Stadium, nga rivalët e Manchester City, në derbin e vlefshëm për Premier League. Erling Haaland dhe Phil Foden shënuan të dy nga një tripletë, duke mos i dhënë asnjëherë një shans “Djajëve të Kuq”, pavarësisht se këta të fundit gjetën 3 herë rrjetën me Antony dhe Martial.
Përpjekjet e City që në fillim të takimit u shpërblyen në minutën e 8’, kur Foden dërgoi në rrjetë topin me një goditje preçize, pas krosimit të Bernardo Silva. Më pas ishte Haaland që dyfishoi rezultatin për “qytetarët” nga një goditje këndi, me një gol të bukur me kokë. Bomberi norvegjez shënoi golin e tij të dytë vetëm 3 minuta më vonë, pas asistit perfekt të Kevin de Bruyne. Përpara mbylljes së pjesës së parë do të kishte kohë dhe për një gol tjetër të City. Kësaj rradhe ishte Foden që shënoi golin e katërt për ekipin e Pep Guardiolës, teksa Haaland mori rolin e asistuesit.
Pjesa e dytë kishte pak a shumë të njejtën pamje, teksa United nuk arriti dot të ekzekutonte ide konkrete në fushë. Gjithsesi, ekipi i Ten Hag arriti të gjente golin e parë në minutën e 56’ të sfidës, pas goditjes fantastike të Antony. Megjithatë, kjo vetëm sa provokoi City-n që të rriste përsëri tempin e lojës. Rezultat i kësaj ishte goli i tretë i Haaland. Sulmuesi shënoi me një goditje preçize, duke dërguar në rrjetë krosën e Sergio Gomez. Pak minuta më vonë, Haaland krijoi mundësinë që Foden të shënonte golin e gjashtë për City, dhe të tretin personal. Të dy lojtarët siguruan kështu një tripletë në këtë takim.
Gjithsesi, kishte ende kohë për 2 gola të United, që ngushëlluan sadopak tifozët e “Djajëve të Kuq”. Anthony Martial shënoi në minutën e 84’ për miqtë, si dhe në minutën e 91’ nga pika e bardhë e penalltisë. Rezultati përfundimtar: 6-3 në favor të “qytetarëve”, të cilët janë vetëm 1 pikë prapa Arsenalit kryesues.
