Drejtuesit e Manchester United janë duke punuar për të sjellë në Old Trafford, Adrien Rabiot, i cili është momentalisht pa kontratë. Francezi mbylli kontratën e tij me Juventus këtë verë duke vendosur të mos rinovojë dhe është në kërkim të kapitullit të rradhës në karrierën e tij. Sipas mediave angleze, përfaqësues të United kanë komunikuar me lojtarin, si dhe me mamanë e tij, e cila është njëkohësisht agjentja e francezit.
Momentalisht duket se një marrëveshje është shumë afër, dhe “Djajtë e Kuq” kryesojnë garën për kartonin e Adrien Rabiot. Chelsea, Aston Villa, Newcastle, por dhe klube të tjera kanë shprehur gjithashtu interesin e tyre për mesfushorin. Vet lojtari ka dashur prej kohësh të luajë në Premier League, dhe United pritet t’i ofrojë atij një kontratë në vlerën e 8-9 milionë paundëve në vit, si dhe një bonus për nënshkrimin e kontratës.
Afrimi i francezit do të jetë mjaft i rëndësishëm për trajnerin Ten Hag, duke parë vështirësitë që “Djajtë e Kuq” hasën sezonin e kaluar me dëmtimet, si dhe performancat e dobëta të disa lojtarëve kyç. Casemiro, Amrabat dhe Scott McTominay dështuan të përmbushnin pritshmëritë e teknikut hollandez, dhe duke marrë parasysh nivelin dhe intensitetin e lartë të Premier League, Ten Hag ka nevojë për sa më shumë opsione, sidomos në mesfushë.
Ndër armët e forta të Rabiot është eksperienca në nivelet e larta. Lojtari ka fituar disa tituj madhorë me Paris Saint-Germain dhe Juventus, si dhe Nations League me kombëtaren franceze. Gjithashtu, United nuk do të shpenzojë para për kartonin e tij, duke qënë se lojtari është momentalisht agjent i lirë.
Gjithsesi, drejtuesit e Manchester United kanë dhe alternativa të tjera për mesfushën, në rast se afrimi i Rabiot nuk realizohet. Youssouf Fofana është emri kryesor në listën e klubit, por ky i fundit është një objektiv më i vështirë.
