Nuk është sekret që Cristiano Ronaldo, një pjesë të madhe të suksesit të tij, ia dedikon jetesës së shëndetshme dhe dietës strikte. Kjo gjë është vënë re dhe në konferencën për shtyp, që superstari portugez ka dhënë për Euro 2020.
Pasi mbërriti në sallën e konferencës, Ronaldo dalloi 2 shishe Coca-Cola të vendosura mbi tavolinë për arsye promocionale. Për habinë e të gjithëve, duket se kjo gjë e ka “acaruar” sulmuesin, i cili mori të dyja shishet dhe i hoqi mënjanë. Më pas Cristiano mori një shishe me ujë në duar, e drejtoi nga kamera dhe u tha gazetarëve: “Aqua!” – që në portugalisht do të thotë ujë.
Gjigandi Coca Cola është një nga sponsorat kryesorë të Europianit, duke përfshirë këtu TikTok dhe Heineken. Pavarësisht kësaj, ylli i Juventus nuk pritet të ketë penalizime për sjelljen e tij. Në fakt, kjo nuk është hera e parë që legjenda portugeze është shprehur kundër konsumit të pijeve të gazuara dhe ushqimeve të shpejta. Në vitin 2020, gjatë Dubai’s Globe Soccer Awards, Ronaldo u shpreh se e irritonte fakti se djali i tij, Cristiano Jr, pëlqente të konsumonte pijen (Coca-Cola). CR7 u shpreh në atë kohë:
“Ndonjëherë tregohem pak i ashpër me Cristiano Jr sepse i pëlqen të pijë Coca Cola apo Fanta.
Zakonisht zihem më të kur ha patate të skuqura, patatina dhe ushqime të tjera, të cilat ai e di se nuk më pëlqejnë. Edhe fëmijët e mi të vegjël kur hanë çokollatë i kanë sytë nga unë.”
Për dietën e tij personale, ylli i Juventus konsumon zakonisht 6 vakte të shëndetshme në ditë. Ushqimet që Ronaldo preferon përfshijnë: sallata me mish pule, peshk të freskët, tost me avokado, kos natyral etj. Edhe në këtë Europian, roli i tij në kombëtaren portugeze pritet të jetë vendimtar për ekipin e Fernando Santos, i cili vjen si kampion në fuqi i turneut.