Trajneri i PSG, Mauricio Pochettino, ka bërë një deklaratë mjaft të bujshme në lidhje me fatin e tij dhe atë të Kylian Mbappe, në Parc des Princes. Pas eleminimit nga Real Madrid në Champions League, e ardhmja e teknikut argjentinas në krye të stolit të parizienëve është vënë vazhdimisht në dyshim. Mbappe nga ana tjetër është linkuar prej kohësh me një lëvizje drejt galaktikëve.
Por Pochettino ka deklaruar me siguri se si ai, ashtu dhe Mbappe, do të vazhdojnë të jenë pjesë e PSG dhe sezonin e ardhshëm. Trajneri u pyet në mënyrë direkte nga mediat, se sa janë shanset që ai dhe Mbappe të jenë ende në Parc des Princes sezonin e ri. Mauricio u përgjigj me vetëbesim:
“100% për të dy ne. Këtë gjë e ndiej. Këtë mund t’ju them sot, nuk mund të flas më shumë, kështu ndihem. Ky është futbolli dhe gjithçka mund të ndodhë. Por duhet t’i përgjigjem pyetjes bazuar në atë që ndiej sot. Dhe këtë po bëj…”
Megjithatë, Pochettino u tregua i shpejtë të sqaronte se ende nuk ka asnjë marrëveshje zyrtare mes tij dhe klubit. Ai shtoi:
“Ende nuk kemi patur bisedime konkrete, përtej asaj që është normale në punën dhe planet tona. Kemi një marrëdhënie shumë natyrale. Komunikojmë në varësi të rrethanave, por kemi vazhdimisht një marrëdhënie të mirë. Vazhdojmë të punojmë fort, duke mos marrë parasysh vetëm të tashmen, por dhe duke menduar për të ardhmen. Kjo është ajo që po bëjmë.”
Duket se telenovela e transferimit të Mbappe nuk do të marrë fund, deri në startin e sezonit të ri. Javën e fundit mediat franceze kanë bërë të ditur se sulmuesi është duke konsideruar seriozisht një rinovim kontrate me parizienët, dhe duket se kjo gjë është konfirmuar dhe nga Pochettino.