Drejtuesit e Tottenham Hotspur duket se do të vendosin pro shkarkimit të Antonio Conte në ditët në vijim. Trajneri kritikoi mjaft ashpër futbollistët e tij pas barazimit 3-3 ndaj Southampton në kampionat, ku londinezët ishin në avantazh 3-1 në një pikë të takimit, por nuk mundën të administronin rezultatin. Tashmë Conte ka fluturuar drejt Italisë dhe nuk dihet nëse do të kthehet më në Londër, si trajner i Tottenham.
Presidenti i klubit, Daniel Levy, ende nuk ka komentuar mbi kritikat e ashpra të Conte ndaj lojtarëve të tij. Levy mendohet se është duke u këshilluar me persona të tjerë mbi lëvizjen e rradhës, por sipas të gjitha gjasave, Contes nuk do t’i ofrohet një shans i dytë. Ryan Mason pritet të jetë trajneri i ri i përkohshëm deri në fund të sezonit.
Një tjetër opsion që drejtuesit e Tottenham mund të konsiderojnë është shfrytëzimi i pauzës së ndeshjeve kombëtare, për të caktuar një trajner të ri, që në këto momente. Luis Enrqiue, Thomas Tuchel dhe Mauricio Pochettino janë tre emrat më të përfolur, por bindja e tyre për të marrë drejtimin e pankinës tek Tottenham mund të rezultojë e vështirë.
Antonio Conte pati një bisedë private me presidentin Levy pas akuzave ndaj lojtarëve, dhe mendohet se italiani ka qartësuar faktin se kritikat ishin ndaj lojtarëve, dhe jo ndaj presidentit apo drejtuesëve të klubit. Kujtojmë se Tottenham mban momentalisht vendin e katërt në kampionat, por Liverpool dhe Newcastle, që janë ndjekësit më të afërt, kanë 2 ndeshje më shumë për të luajtur.
Kjo do të thotë se objektivi i Tottenham për t’u kualifikuar në Champions League sezonin e ardhshëm është në rrezik, gjë që vështirëson akoma më shumë vendimin që klubi duhet të marrë në lidhje me Conte. Gjithsesi, nga londinezët pritet një vendim zyrtar shumë shpejt.