Troy Deeney është i mendimit se Anglia nuk i ka mundësitë për të lënë jashtë ekipit të Euro 2020, një lojtar me emër si Alexander-Arnold i Liverpool. Sulmuesi i Watford ka deklaruar se Arnold është nga talentet që ka bërë diferencën me “The Reds” në sezonet e fundit. Mungesa e Alexander-Arnold në ndeshjet që Anglia zhvilloi për kualifikueset e Botërorit 2022, ishte një surprizë që habiti të gjithë opinionin sportiv.
Pas zhvillimeve të fundit, duket se mbrojtësit të djathtë do ti duhet të garojë për një vend në kombëtare, pavarësisht formës së treguar me Liverpool. Ndërkohë Deeney është i mendimit se krosat perfekte dhe inteligjenca në situatat kur topi nuk është në lojë, e bëjnë Trent Alexander-Arnold favorit për një vend në skuadrën e “3 Luanëve”.
Deeney është shprehur:
“Duhet të kujtojmë se ky (Alexander-Arnold) është një lojtar që luajti rol kyç në fitoren e Champions League dhe Premier League nga Liverpool.
Edhe pse forma e tij ka qenë me ulje dhe ngritje këtë sezon, Anglia nuk mund të humbasë një lojtar të tillë.”
Sulmuesi i Watford ka shkuar dhe më tej, duke thënë se dhe sulmuesi Harry Kane, do të donte dëshpërimisht Arnold në ekip, për shkak të saktësisë në asistime. Ndërkohë trajneri i kombëtares angleze, Gareth Southgate ndodhet përballë një dileme të vështirë, teksa do t’i duhet të ndërmarrë një vendim përfundimtar për Arnold shumë shpejt.
Numri 1 i pankinës së “3 Luanëve” ka folur shumë shkurt për mos thirrjen e mbrojtësit në ndeshjet kualifikuese, duke e justifikuar me formën në rënie të Trent gjatë këtij sezoni. Shumë zëra në portalet angleze komentojnë se Southagate ka kohë që ka nisur komunikimin me lojtarët e tij, për t’i informuar ata në lidhje me shanset e tyre, për t’u bërë pjesë e ekipit për Europianin. Por deri në këtë moment, nuk ka ende asgjë zyrtare në lidhje me mbrojtësin e Liverpool.