Edhe pse na ndajnë vetëm 2 muaj nga starti i Europianit 2020, UEFA ka ende shumë pikëpyetje mbi planifikimin dhe zhvillimin e ndeshjeve të kompeticionit. Dilema e fundit lidhet me disa nga stadiumet ku është menduar të zhvillohet Euro 2020. Specifikisht bëhet fjalë për stadiumet në qytetet e Dublin, Glasgow dhe Bilbao.
UEFA ka vendosur si kusht të saj një pjesëmarrje minimale prej 25% në stadium, për ndeshjet e kompeticionit. Përfaqësuesit e qyteteve në fjalë nuk janë në gjendje të garantojnë plotësimin e këtij kushti. Për këtë arsye qytetet rrezikojnë të mos bëhen pjesë si pritëse të kompeticionit.
Kjo situatë ngre pikëpyetje të tjera, dhe ajo më e rëndësishmja është fakti se ku duhet të zhvillohen ndeshjet në qoftë se qytetet e mësipërme përjashtohen nga plani. Zgjidhja mund të vijë nga Boris Johnson, kryeministri i Anglisë, i cili ka shprehur disa herë dëshirën për të marrë më shumë peshë dhe organizuar më shumë ndeshje në vendin e tij. Zëra të tjerë kanë raportuar dhe idenë se të gjitha ndeshjet e Euro 2020 mund të organizohen në Angli. Gjithsesi kjo ide është përgënjeshtruar nga analistë të cilët thonë se shtetet e tjera nuk do të heqin dorë kurrsesi nga organizimi i kompeticionit.
Një skenar realist është ai ku Anglia merr përsipër disa ndeshje shtesë, të cilat mund të zhvillohen në stadiumin Wembly. Në arenën e famshme janë parashikuar tashmë 7 ndeshje për t’u zhvilluar, dhe përfaqësuesit e federatës angleze të futbollit thonë se është e mundur dhe zhvillimi i takimeve të tjera. Një tjetër mundësi është dhe stadiumi i Tottenham Hotspur. Me 62,300 vende dhe ambiente moderne stadiumi është zgjidhja perfekte për të organizuar ndeshje, duke zbatuar dhe masat anti-covid.
UEFA gjithashtu i ka sytë dhe nga: Baku (Azerbajxhan), Kopenhagen (Danimarkë), Munich (Gjermani), Budapest (Hungari), Amsterdam (Hollandë), Bukuresht (Rumani), dhe Shën. Petersburg (Rusi), si arena të mundshme për zhvillimin e ndeshjeve. Gjithsesi në këto momente nuk ka asgjë zyrtare mbi këto propozime.
Burimi: Daily mail
