Nëse tifozët dhe VIP-at jashtë shtetit, nuk përjashtohen nga rregullat e rrepta të karantinës në shtetin anglez, UEFA mund të zhvendosë gjysmëfinalet dhe finalen e Europianit nga Wembley. Qeveria e futbollit europian lëshoi një deklaratë ku thuhej se ishte “konfidente” se java e fundit e Europianit do të luhej në Londër, por sipas saj, ekziston gjithmonë dhe një plan i paparashikueshëm.
Mësohet se Budapesti është opsioni i parë nëse finalet nuk do të luhen në mitikun Wembley në Londër. Momentalisht, ndeshjet në Puskas Arena zhvillohen me kapacitet të plotë. Për këtë arsye, arena është parë si vendi ideal për të mirëpritur gjysmëfinalen dhe finalen e kompeticionit, duke marrë parasysh interesin e madh për takimet.
UEFA sugjeroi se akomodimi i fansave për finalen mund të bëhet në të njejtën mënyrë siç u bë gjatë finales së Champions League në Portugali. Në rastin e përmendur, fansat u vendosën në qytetin pritës vetëm për 24 orë, duke respektuar kufizimet anti-covid. UEFA deklaroi:
“Momentalisht jemi në diskutime me autoritetet lokale (angleze), për të lejuar një numër të caktuar fansash të ndjekin ndeshjet nga stadiumi. Qëndrimi i tyre në Mbretërinë e Bashkuar do të zgjasë vetëm 24 orë. Lëvizja e tifozëve do të jetë e kufizuar në sistemet e transportit dhe stadiumet përkatëse. E kuptojmë presionin me të cilin po përballet qeveria britanike dhe shpresojmë të arrijmë një konkluzion të kënaqshëm mbi këtë çështje.”
Qeveria britanike konfirmoi se 4 ndeshjet finale të Euro 2020 do të luhen në Wembley, përballë një audience prej minimalisht 40,000 tifozësh. Konfirmimi erdhi pavarësisht lajmit tjetër se kufizimet anti-covid, do të ngelen ende në fuqi, ndryshe nga ç’ishte parashikuar.
Për organizimin e eventeve, qeveria britanike ka ngritur një program të veçantë të quajtur ERP (Events Research Programme). Që prej muajit prilli, programi ka patur në fokusin e tij, testimin e skenarëve të ndryshëm se si mund të organizohen evenimentet sportive të këtij lloji. Momentalisht, e vetmja dilemë e autoriteteve organizative, mbetet akomodimi i fansave të huaj në stadiume.
