Debutimi i shumëpritur në shtëpi i Leo Messit me PSG, duket se nuk ka shkuar ashtu si pritej. Superstari argjentinas u zëvëndësua nga trajneri Pochettino në pjesën e dytë të takimit, duke habitur fansat e pranishëm në stadium, por dhe një pjesë të opinionit sportiv. Parizienët fituan përballë Lyon, por edhe kësaj rradhe vështirësitë ishin të dukshme.
Ishte Mauro Icardi që shënoi golin e fitores për vendasit, gol ky që erdhi vetëm në minutat shtesë në fund të takimit. Megjithëse kjo ishte fitorja e 6, në po kaq ndeshje të luajtura për francezët, largimi i Messit në pjesën e dytë ka sjellë reagime të të gjitha llojeve. Dhe vet lotjari pati një komunikim të shkurtër me Pochettinon, në momentin që la fushën, dhe nga mimika e fytyrës u pa qartë se nuk ishte i kënaqur.
Por, këto reagime duket se nuk e shqetësojnë numrin 1 të pankinës së PSG. Ish-trajneri i Tottenham deklaroi pas ndeshjes:
“Mendoj se e dimë të gjithë se kemi lojtarë të jashtëzakonshëm në skuadrën tonë prej 35 vetash. Por vetëm 11 mund të luajnë, jo më shumë. Vendimet që merren gjatë lojës janë për të mirën e skuadrës dhe të vet lojtarëve.”
Pochettino gjithashtu shtoi:
“Të gjithë trajnerët mendojnë për vendimet që marrin. Disa herë funksionon, disa herë jo. Disa herë lojtarëve u pëlqen, dhe herë të tjera jo. Në fund të ditës prandaj jemi këtu. Këto janë vendimet të cilat duhet të ndërmerren nga trajneri. Sa i përket shkëmbimit të fjalëve me të (Messin), e pyeta nëse ishte okay…ai më tha po.”
Ndeshja e rradhës për PSG do të jetë ajo përballë Metz në transfertë. Messi do të shpresojë të gjejë golin e parë me fanellën e PSG, teksa argjentinasi u ndal nga shtylla edhe në ndeshjen ndaj Lyon.
